Jambyl oblysy Baizaq aýdanyndaǵy áskeri qoimada bolǵan jarylys ornynan taǵy bir adamnyń máiiti tabyldy. Bul týraly 30 tamyzda Qazaqstan tótenshe jaǵdailar ministrligi habarlady. Máiitti qorǵanys ministrliginiń saperleri tapqan, qazir marqumnyń kim ekeni anyqtalyp jatyr.
"Jambyl oblysyndaǵy jarylystan qaza tapqandar sany on bes adamǵa jetti. Qaitys bolǵandar arasynda azamattyq qorǵaý organdarynyń qyzmetkerleri de bar. Joǵalǵan bir adam izdestirilip jatyr", - delingen habarlamada.
Osylaisha Jambyl oblysyndaǵy jarylystan qaza bolǵandar sany 15 adamǵa jetti. Qazir joǵalǵan taǵy bir adamdy izdeý jalǵasyp jatyr. Apattan 98 adam jaralanǵany habarlandy.
Qaza bolǵandardyń arasynda órt sóndirýshiler, tótenshe jaǵdai ministrliginiń, áskeri bólimniń, áskeri kúzet pen áskeri prokýratýranyń qyzmetkerleri bar.
26 tamyzda Jambyl oblysy Baizaq aýdanyndaǵy 28349 áskeri bólimindegi qoimadaǵy oq-dáriler jarylyp, arty órtke ulasqan.
Jarylystan keiin áskeri qoimaǵa jaqyn mańdaǵy aýyldardan júzdegen adam evakýatsiialandy. Qazir olardyń bári úiine oralǵan. Turǵyndar arasynda jaraqattanǵandar joq deidi jergilikti bilik.
Jambyl oblysy ákimdiginiń aitýynsha, apat saldarynan 106 turǵyn úi, 12 kommertsiialyq obekt, úsh mektep búlingen. Ákimdik úilerdi eki ai ishinde qalpyna keltirýge ýáde berdi.
Qorǵanys ministri Nurlan Ermekbaev jarylysqa qoimada qaýipsizdik talaptarynyń saqtalmaýy, ia himiialyq reaktsiiamen ózdiginen týýy nemese diversiia sebep bolýy múmkin dep topshylaidy.
Ministrlik 10 jarylys bolǵanyn, áskeri qoimada Arys qalasyndaǵy qoimadan ákelingen oq-dáriler qoiylǵanyn rastady. 2019 jyly Arystaǵy áskeri qoimada da osyǵan uqsas jarylys bolyp, saldarynan tórt adam qaza tapqan.
