QR Ishki ister ministrligi Jambyl oblysyndaǵy oq-dári qoimasyndaǵy jarylysqa pikir bildirdi, dep habarlaidy QazAqparat.
«Jambyl oblysynda bolǵan áskeri bólim aýmaǵyndaǵy jarylystar faktisi boiynsha tolyq jáne obektivti tekserý maqsatynda IIM ortalyq apparatynyń tájiribeli qyzmetkerleri qatarynan jedel-tergeý toby quryldy. Tergeý Qylmystyq Kodeksiniń 462-babynyń 3-bóligi (eki jáne odan da kóp adamnyń ólimine ákep soqqan oq-dárilermen jáne jarylǵysh zattarmen jumys isteý qaǵidalaryn buzý) boiynsha júrgiziledi», - dedi QR Ishki ister ministrliginiń resmi ókili Nurdildá Oraz QR IIM uiymdastyrǵan aptalyq brifingte.
Onyń aitýynsha, shuǵyl tergeý is-sharalary, onyń ishinde jábirlenýshiler men kýágerlerden jaýap alý, sondai-aq zalaldy anyqtaý úshin búlingen obektilerdi tekserý júrgiziledi. Tiisti sot saraptamalary taǵaiyndaldy.
«Oqiǵa ornynda saperler brigadasy, qyzmettik-izdestirý itteri bar kinologtardy tarta otyryp, izdestirý jumystary júrgizilýde. Qazirgi ýaqytta 15 áskeri qyzmetshi men qutqarýshynyń denesi tabyldy.
Aita keteiik, qoǵamdyq tártipti saqtaý jáne oqiǵanyń saldaryn joiý úshin 800-den astam politsiia qyzmetkeri men Ulttyq ulan sarbazdary, 113 arnaiy tehnika, onyń ishinde 54-i politsiia departamentinen jáne 59-y basqa memlekettik organdardan jumyldyryldy. Politsiia tótenshe jaǵdai ornyna kirý joldaryn, sonyń ishinde temirjol joldaryn ýaqytsha jaýyp, oqiǵa ornyna meditsinalyq jedel-járdem brigadalaryn alyp júrý uiymdastyryldy», - deidi resmi ókil.
Tótenshe jaǵdai aýdanyna jaqyn ornalasqan Qainar, Jibek joly, Úshbulaq eldi mekenderinen 700-den astam adam qaýipsiz jerge kóshirildi, poiyzdyń 2 350 jolaýshysyn avtobýstarmen alyp júrý uiymdastyryldy, halyqqa túsindirý jumystary júrgizildi.
«Baizaq aýylyndaǵy №4 litsei mektebinde jergilikti atqarýshy, quqyq qorǵaý jáne basqa da memlekettik organdardyń qatysýymen jedel Shtab quryldy. Qoǵamdyq tártipti saqtaý úshin Ulttyq ulannyń áskeri qyzmetshileri men politsiia qyzmetkerleri táýlik boiy patrýldeý júrgizedi. TJ ornyndaǵy jedel jaǵdai turaqty jáne quqyq qorǵaý organdarynyń baqylaýynda», - dedi N. Oraz.
Esterińizge sala ketsek, 26 tamyzda saǵat shamamen 19:00-de Jambyl oblysynyń Baizaq aýdanynda ornalasqan áskeri bólim qoimalarynyń birinen órt shyǵyp, joiqyn jarylys boldy. Sońǵy málimet boiynsha, Jambyl oblysyndaǵy jarylystan 15 qaza tapqan.
