Jambyl oblysynda jemqorlyq baǵyttaryn anyqtaý jumystary kúsheitilgen, dep habarlaidy "Ult aqparat".
QR Sybailas jemqorlyqqa qarsy is-qimyl agenttiginiń Jambyl oblysy boiynsha departamentiniń basshysy Ádilhan Áshirbaevtyń aitýynsha, biyl óńirde 6 júieli sybailas jemqorlyq faktisi anyqtalǵan.
«Biylǵy jyldyń toǵyz aiynda 6 júieli sybailas jemqorlyq, shaǵyn jáne orta biznes jumysyna aralasýdyń 14 faktisi, laýazymdy tulǵalar tarapynan kóleńkeli ekonomika sýbektilerine qamqorlyq jasaýdyń 7 jáne memlekettik baǵdarlamalardy iske asyrýǵa bólingen biýdjettik qarajatty urlaýdyń 14 faktisi tirkeldi. Barlyq jaǵdaida ótken jylǵa qaraǵanda kórsetkishterde ósim baiqalady»,- deidi atalǵan departament basshysy.
Ádilhan Áshirbaev atap ótkendei, tirkelgen qylmystar sany boiynsha memlekettik organdar arasynda kóshbasshylar jergilikti atqarýshy bilik organdary boldy. Jyl basynan beri sotqa 93 qylmystyq is jiberilse, 89 adam qylmystyq jaýapkershilikke tartylǵan. Máselen, qylmystyq ister boiynsha keltirilgen shyǵyn kólemi 1,4 milliard teńgeni qurasa, onyń 975 million teńgesi ótelip, 122,3 million teńgeniń múlkine shekteý salynypty.
«Sybailas jemqorlyq quqyq buzýshylyq faktileri týraly habarlaǵan tulǵalarmen profilaktikalyq jumystar turaqty túrde júrgiziledi. Esepti kezeńde jalpy somasy 2,8 million teńgemen 20 adam marapattalǵan. Kezekti ret qoǵamdy sybailas jemqorlyq kórinisterinen tys qalmaýǵa shaqyrǵym keledi. Sybailas jemqorlyq qylmystar týraly bizge habarlai otyryp, siz sybailas jemqorlyqqa qarsy is - qimyl isinde azamattyq paryzyńyzdy oryndap qana qoimai, sondai-aq zańdy negizde aqshalai yntalandyrýǵa sene alasyz», - dep atap ótti Ádilhan Áshirbaev.
