Aýdandaǵy tótenshe jaǵdai kezinde zardap shekken nysandardy tekserý jáne qalpyna keltirý úshin 5 jumys toby qurylyp, olardyń quramyna qurylys basqarmasynyń, aýdan ákimdiginiń, Qazaq qurylys jáne sáýlet ǵylymi zertteý institýtynyń, jobalaý uiymdarynyń qyzmetkerleri jáne tótenshe jaǵdai qyzmetkerleri engen.
Atalǵan jumys toptarymen Baizaqtaǵy Qainar, Úshbulaq, Jibek joly, Tórekeldi, Bazarbai, Kókbastaý aýyldaryndaǵy barlyq úiler zerdelenip, 159 turǵyn úi, 12 kommertsiialyq, 4 áleýmettik nysannyń zardap shekkendigi anyqtaldy. Onyń ishinde 35 úi men 12 kommertsiialyq, 1 áleýmettik nysanǵa jáne 1 aýylishilik jolǵa aitarlyqtai eleýli zardap kelgendikten, memleket esebinen jóndeý jumystaryn júrgizý boiynsha sheshim qabyldanǵan.
Sondai-aq, aitarlyqtai zardap shekken ári buǵan deiin tozyǵy jetken Jibek joly aýylynyń №5 orta mektebiniń eski ǵimaratynyń ornyna salynatyn jańa mekteptiń qurylysy bastaldy. Berdibek Saparbaev mekteptiń sapaly salynýyn, onda oqýshylardyń alańsyz bilim alýy úshin tiisti qolaily jaǵdai jasaýdyń mańyzdylyǵyna airyqsha toqtaldy.
Qazirgi tańda ózge nysandar boiynsha jumystar qyzý júrýde. Jeńil zardap shekken 3 áleýmettik nysan men 124 jeke turǵyn úi demeýshiler esebinen jóndelýde desek, búginde 3 áleýmettik nysan jáne 72 turǵyn úi qalpyna keltirildi. Eleýli dárejede zardap shekken turǵyn úiler boiynsha da jumystar qolǵa alynǵan.Berdibek Saparbaev barǵan Qainar aýylynda mundai 19 úi bar desek, dál búgin 6 úidiń shatyry jabylyp, ishki árleý jumystary atqarylýda.
Jalpy bul sharalarǵa 12 merdigerdiń 187 jumysshysy, 22 tehnikasy jumyldyrylǵan. Merdigerler barlyq jumystardy tiisti merzimde aiaqtaityndyqtaryna sendirdi.
Oblys ákimi jergilikti turǵyndarmen, áskerilermen kezdesip, oi-usynystaryn tyńdady.
