Jambyl oblysynda «Spýtnik V» vaktsinasynyń II dozasyn 6 myńǵa jýyq adam qabyldap úlgerdi. Bul týraly óńirlik kommýnikatsiialar alańynda ótken brifingte oblystyq densaýlyq saqtaý basqarmasynyń basshysy Áset Qaliev aitty, dep habarlaidy "Ult aqparat".
Aita ketý kerek, oblys boiynsha «Gam-Kovid-Vak» iaǵni, «Spýtnik V» vaktsinasynyń I komponenti 14 005 adamǵa egilgen bolatyn. Onyń ishinde 604 meditsina mamany, 3256 pedagog, 426 kúsh qurylym qyzmeti, 58 stýdent, 81 memlekettik qyzmetker bar desek, 4142-si taǵy basqalary. Al, 21 kúnnen keiin 14005 adamnyń 5651-i vaktsinanyń ekinshi dozasyn saldyryp úlgergen.
«Vaktsina alǵandar tarapynan densaýlyǵyna teris áser berip, shaǵym keltirgender tirkelgen joq. Halyq densaýlyǵy jáne densaýlyq saqtaý júiesi týraly» QR kodeksiniń 77 babyna sáikes, barlyq meditsinalyq protsedýralar, sonyń ishinde vaktsinatsiia aqparattandyrylǵan azamattyń kelisimimen jasalynady. Vaktsinatsiiadan bas tartqan azamattar ákimshilik jáne qylmystyq jaýapkershilikke tartylmaidy.
Vaktsinatsiia elimizde tek erikti túrde júrgiziledi», — dedi Áset Qaliev.
Búginde Jambyl óńiri jasyl aimaqta. Degenmen, COVID-19 6613 adamnan anyqtaldy. Pnevmoniianyń 2075 jaǵdaiy tirkelgen. Qazir oblystaǵy infektsiialyq statsionardaǵy 439 naýqastyń 32-si jansaqtaý bóliminde jatyr. Al aimaqta ekpe júrgizý boiynsha aq halattylar arnaiy daiyndyqtan ótken. Mamandar sany 1022-di quraidy. 36 ekpe kabineti, 1 jyljymaly ekpe egý pýnkti men 16 kóshpeli ekpe júrgizetin brigada bar.
