Búgin tańǵy saǵat 03.00-de Batys Eýropa-Batys Qytai avtojolynyń 544-shaqyrymynda Taraz qalasy baǵytynda kele jatqan «Skaniia» júk kóliginiń tirkemesi ózdiginen órtenip ketti, dep habarlaidy QazAqparat.
Jambyl oblysy politsiia departamenti baspasóz qyzmetiniń jetekshisi Gúlsara Muhtarqulovanyń málimetinshe, órt jol qozǵalysyna kedergi keltirgendikten, avtokólikter toqtatylǵan.
«Artynsha, saǵat 03.40 kezinde janyp jatqan tirkemege 550-600 metr jetpei, DAF júk kóligi jolda bir baǵytta toqtap turǵan 10 kólikti qaǵyp ketti. Onyń ishinde eki jolaýshylar avtobýsy, eki «Toiotami Kamri«, «Aýdi 100«, «Shevrole Kobalt«, « Daimler Kraisler«, BMW X5, «Toiota Alfard«, «Audi 80« jeńil kólikteri boldy. Soqtyǵysýdan keiin 4 avtokólik órtendi. Saldarynan «Toiota Kamri« avtokóliginiń jolaýshysy oqiǵa ornynda kóz jumdy, 9 adam túrli jaraqattarmen qalalyq aýrýhanaǵa jetkizildi, onyń ishinde 3 adam reanimatsiia bólimine jatqyzyldy», - deidi vedomstvo ókili.
Atalǵan derek boiynsha QK 345-baby 3-bóligi boiynsha sotqa deiingi tergeý bastalǵan, qajetti saraptamalar taǵaiyndalǵan.
«Politseiler aldyn alý sharalaryn júrgizip-aq jatyr, alaida júrgizýshiler jol qozǵalysy erejelerine mán berer emes. Áitpese, osy atojoldyń 554-shaqyrymynda «Júk kólikteriniń qozǵalysyna tyiym salynady« degen jol belgisi tur, iaǵni Kúiik asýy arqyly túsýge tyiym salynǵan. Alaida júk kólikteriniń júrgizýshileri jol belgileri talaptaryn elemeidi, bul osy sekildi qaiǵyly jaǵdailarǵa ákeledi», - dep atap ótti G.Muhtarqulova.
Osy oqiǵaǵa bailanysty Jambyl oblysy ákimdiginiń densaýlyq saqtaý basqarmasy 12 adamnyń zardap shekkenin habarlady. Onyń 2-ýi jolda ótip bara jatqan avtokólikpen Jýaly aýdandyq aýrýhanasyna, 10-y Taraz qalalyq kópbeiindi aýrýhanasyna jetkizilgen.
«Jýaly aýdandyq ortalyq aýrýhanasynyń jetkizilgen 2 adamǵa meditsinalyq kómek kórsetilip, úilerine jiberildi. Al qalalyq kópbeiindi aýrýhanasyna túsken 10 adamnyń 3-eýi Ózbekstan azamattary. Zardap shekkenderdiń ishinen 5 naýqas aýrýhanaǵa jatqyzyldy. 4-eýi – reanimatsiia bólimshesine, 1 azamat – travmotologiia bólimshesine jiberildi. 5 naýqas ambýlatorlyq em qabyldaýǵa úilerine qaitaryldy», - deidi basqarmanyń baspasóz qyzmetkeri Tolqyn Ómirbaeva.
Ol da 1 adamnyń oqiǵa ornynda qaitys bolǵanyn rastady.
Jalpy, statsionarǵa jatqyzylǵan naýqastardyń barlyǵy qajetti dári-dármektermen jáne meditsinalyq buiymdarmen qamtamasyz etilgen. Meditsinalyq kómek kórsetýge 5 tehnika, 15 meditsinalyq qyzmetkerler jumyldyryldy.
Aita keteiik, jyl basynan beri jambyldyq politsiia qyzmetkerleri 315 jol belgisin ornatty, 2 436 shaqyrym jol tańbasyn, 8 475 sharshy metr shuńqyr jóndeldi, 11 jol býferin, 1 034 signal baǵanalaryn jáne 4 056 katafotty aýystyrdy, 1072 metr zaqymdalǵan brýstardy teńestirdi.
