Jambylda er adam 160 keliden astam esirtkimen ustaldy

Jambylda er adamnan 160 keliden astam esirtki tárkilendi, - dep habarlaidy QazAqparat.

Jambyl oblysynyń Politsiia departamenti Esirtki qylmysyna qarsy is-qimyl basqarmasynyń qyzmetkerleri «Qarasora-2021» respýblikalyq jedel aldyn alý is-sharasyn ótkizý barysynda Shý aýdanynan 100 shaqyrym jerde 27 jastaǵy jergilikti turǵyndy esirtki zattaryn daiyndaý kezinde ustady. 

Sol mańdaǵy aýmaqty tekserý kezinde jas jigitten salmaǵy 60 keli 440 grammbolatyn «kannabis ósimdigi» esirtki zaty tabylyp, tárkilendi. Sondai-aq jedel-izdestirý is-sharalaryn júrgizý kezinde esirtki zatyn satýshydan jalpy salmaǵy 103 keli 240 gramm «keptirilgen marihýana» esirtki zatynyń 10 qaby tárkilendi, kúdikti bul qaptardy jaz mezgilinde eldiń soltústik aimaqtaryna jetkizý úshin daiyndap, jasyrǵan.

«Ustalǵan er adam kinásin moiyndady, Shý qalasynyń ýaqytsha ustaý izoliatoryna qamaqqa alyndy. Qazaqstan Respýblikasy Qylmystyq kodeksiniń 296-baby 4-bóligi (Esirtki, psihotroptyq zattardy, sol tektesterdi ótkizý maqsatynsyz asa iri mólsherde zańsyz daiyndaý, qaita óńdeý, satyp alý, saqtaý, tasymaldaý) boiynsha sotqa deiingi tergeý amaldary bastaldy, qylmystyń bul túrimen úsh jyldan jeti jylǵa deiingi merzimge bas bostandyǵynan aiyrý túrindegi jaza qoldanylady.

Qazirgi ýaqytta qylmystyq áreketti QR QK-niń 297-baby 3-bóligimen qaita saralaý qarastyrylýda. Bul qylmysty jasaǵany úshin múlki tárkilenip, on jyldan on bes jylǵa deiingi merzimge bas bostandyǵynan aiyrý túrindegi jaza qarastyrylǵan»,-delingen politsiia departamenti baspasóz qyzmetiniń habarlamasynda.