Qazaqstannyń Jambyl jáne Ózbekstannyń Ándijan oblystarynyń aýyl sharýashylyǵy salasynyń ókilderi ózara tájiribe almasýda.
Bul týraly Tashkenttegi Ózbek-Qazaqstan Iskerlik keńesiniń otyrysynda Jambyl oblysy Kásipkerler palatasynyń direktory Oljas Qarjaýov málimdedi, - dep habarlaidy "Ult aqparat".
Atalmysh basqosýda Oljas Qarjaýov sońǵy jyldary Ózbekstandaǵy mal sharýashylyǵynyń belsendi damyp kele jatqanyn, soǵan qarai mal azyǵyna degen suranystyń da artqanyn tilge tiek etti.
«Jambyldaǵy «Good zhem» JShS qurama jáne kontsentratsiialanǵan jem-shóp óndiretin eń iri kásiporyndardyń biri desek, ondaǵy óndirilgen ónimniń 74 paiyzy Ózbekstanǵa eksporttalady. Bul úsh myń tonnadan astam ónimdi quraidy. Osy oraida men jem-shóp óńdeitin birlesken kásiporyndar qurýdy usynamyn», - dedi O.Qarjaýov.
Sondai-aq, Ózbekstanyń jemis-kókónis jáne baqsha daqyldaryn ósirý boiynsha bai tájiribesin atap ótken palata direktory Jambyl jáne Ándijan oblystarynyń sharýalarymen ózara tiimdi tájiribe almasý boiynsha jumystyń jolǵa qoiylǵanyn málimdedi.
Buǵan deiin Jambyl oblysy aýmaǵynda pitomnikter júrgizý maqsatynda anar, badam, júzim jáne limon siiaqty joǵary marjinaldyq daqyldardyń kóshetterin jetkizý boiynsha ýaǵdalastyq ornatylǵan bolatyn.
Óz kezeginde, Ózbekstannyń saýda-ónerkásip palatasynyń tóraǵasy Adham Ikramov birlesken jobalardy qurýǵa qyzyǵýshylyq tanytyp, olardy júzege asyrý úshin barlyq josparly jumystar barysy zerdelenetin jetkizdi. Ol týraly aldaǵy kezdesýlerde egjei-tegjeili talqylaýdy usyndy.
