Jambyl oblysynyń jeri myń gektardan astam aýmaqqa ulǵaidy, dep habarlaidy "Ult aqparat".
Úkimet basshysy Asqar Maminniń qaýlysymen Almaty oblysyndaǵy Jambyl aýdanynyń myń gektardan astam jeri Qordai aýdanyna qosyldy. Mundai qajettilik turǵyndardyń uzaq jyldan bergi ótinishterinen keiin týyndaǵan. Buǵan deiin jergilikti jurt qujattaryn rásimdeý, memlekettik qyzmet túrlerin alý úshin 150 shaqyrym jerdegi aýdan ortalyǵyna barýǵa májbúr bolǵan. Al halyqtyń júrip-turýyna Almaty oblysynan góri 70 shaqyrym jerdegi Jambyldyń Qordai aýdany yńǵaily. Bul másele qos oblystyń ákimdikteri men máslihat jáne Májilis depýtattarymen qaralyp, qoldaý tapqan.
«Qordai aýdanyndaǵy Otar aýylyna qarasty Gvardeiskii áskeri qalashyǵynyń tap irgesinde «Voensovhoz» atalyp ketken eldimeken bar. Sol eldimekenniń jartysy Almaty oblysynda qalyp qalǵan. Qazir sol eldimekenderdi Otarǵa, Jambyl oblysyna qostyq. Endi mundaǵy jurt sharýasyn bitirý úshin 150 shaqyrym jerdegi Uzynaǵashqa sabylmai, iek astyndaǵy Qordaiǵa bara salady. Qazir eki oblys ákimdigi tiisti qujattardy ázirlep jatyr. Bul shara bir aidyń ishinde aiaqtalýy tiis,-deidi oblystyq jer qatynastary basqarmasynyń bólim basshysy Aidar Tájikov.
Aita keteiik, Jambyl oblysynyń qaramaǵyna 1090 gektar alqap múlkimen kóshti. Onyń ishinde Otardaǵy «Gvardeiskii» áskeri garnizony, oqý-jattyǵý poligony, biologiialyq qaýipsizdik poblemalarynyń ǵylymi-zerteý institýtynyń ǵimaraty jáne birneshe kásipkerlik nysandar bar.
