Jambyl oblysynyń turǵynynan jarty tonnadan asa keptirilmegen marihýana tabyldy, - dep habarlaidy "Ult aqparat" Polisia.kz saityna silteme jasap.
7 shildede "Qarasora-2022" respýblikalyq jedel-aldyn alý is-sharasy barysynda Jambyl oblysynyń Politsiia departamenti Esirtki qylmysyna qarsy is-qimyl basqarmasynyń qyzmetkerleri Shý aýdany aýmaǵynda pilotsyz ushý apparatyn paidalana otyryp, jedel-izdestirý is-sharalaryn júrgizý kezinde jabaiy sorany jinap jatqan 41 jastaǵy jergilikti turǵyndy ustady.
Politsiia qyzmetkerleri kúdikti ustalǵan mańdy tekserý barysynda Ýlia atty qyzmettik ittiń kómegimen shabylǵan jabaiy qarasorany taýyp, tárkiledi. Saraptama qorytyndysyna sáikes, ol jalpy salmaǵy 517 keli "keptirilmegen marihýana" bolyp shyqty.
Ustalǵan er adam kinásin tolyq moiyndap, Shý qalasynyń ýaqytsha ustaý izoliatoryna qamaýǵa alynǵan.
"Derekke qatysty Qylmystyq kodekstiń 296-baby 4-bóligi boiynsha sotaldy tergeý amaldary bastaldy. Esirtki zattaryn ótkizý maqsatynda jinaǵany dáleldengen jaǵdaida, kúdiktige múlkin tárkilei otyryp, 10 jyldan 15 jylǵa deiingi merzimge bas bostandyǵynan aiyrý túrindegi jaza kózdelgen", - dedi Jambyl oblysynyń Politsiia departamenti Esirtki qylmysyna qarsy is-qimyl basqarmasynyń bastyǵy Asqar Jumabekov.
