Jambyl oblysynyń ákimi Berdibek Saparbaev tótenshe jaǵdai jónindegi jedel shtabtyń kezekti otyrysyn ótkizdi, dep habarlaidy "Ult aqparat" óńir basshysynyń resmi saityna silteme jasap.
Otyrysta aimaqtaǵy epidemiologiialyq jaǵdai, karantindik rejimdi saqtaý jáne karantinnen keiingi kezeńde birqatar ónerkásiptik kásiporyndar men shaǵyn biznes nysandarynyń jumysyn qaita bastaýǵa bailanysty máseleler talqylandy.
Taýarlar men qyzmetterdiń sapasy men qaýipsizdigin baqylaý departamentiniń basshysy Berik Jarqynbekovtiń habarlaýynsha, 2020 jylǵy 23 sáýirdegi jaǵdai boiynsha oblys aýmaǵynda jalpy 88 koronavirýs indetin juqtyrý oqiǵasy tirkelgen.
B. Jarqynbekovten oblys ákimi halyq arasynda aldyn alý jáne túsindirý jumystaryn kúsheitýdi talap etti. Adamdarǵa olar ózin-ózi oqshaýlaý arqyly tek ózderin ǵana emes, jaqyndary men ainalasyndaǵylaryn da qorǵai alatyndyqtaryn túsindirý kerek. Bul oraida salalyq vedomstvonyń qyzmetkerleri buqaralyq aqparat quraldarynda belsendilik tanytpai otyrǵandyǵy aityldy.
Óńirdegi bul baǵyttaǵy medqyzmetkerlerge eńbekaqydan bólek qosymsha tólemder tólenýde. Atap aitsaq, naýryz aiynda 270 dáriger, onyń ishinde 40 dáriger men 129 orta meditsinalyq qyzmetkerge 40,1 mln teńgege ústemeaqy tólengen. Naýryz aiynyń qorytyndysy boiynsha 8 meditsinalyq uiym qarjy únemdeý esebinen 1319 qyzmetkerge jalpy somasy 88,9 mln teńgege syiaqy bergen. Meditsinalyq qyzmetkerlerdiń turǵyn úi-turmystyq máseleleri de oń sheshimin tabýda. Osy turǵyda 232 meditsinalyq qyzmetker qonaq úige ornalastyrylyp, olardy jumys ornyna tasymaldaý úshin kólik uiymdastyrylǵan.
Oblysta COVID-2019 boiynsha meditsina, politsiia jáne KVI-ge qarsy is-sharalarǵa qatysatyn áskeri qyzmetkerler testileýden ótip, olar jeke qorǵaný quraldarymen qamtamasyz etiledi. Sondai-aq, jiynda karantin jaǵdaiynda adamdar azyq-túlik pen taǵamdardy úige jetkizý qyzmetine kóbirek júgine bastaǵandyǵy aityldy. Sońǵy ýaqytta Taraz qalasynda jetkizip berý qarqyny 8 myńnan 11,5 myńǵa deiin ósken.
Sonymen qatar, basqosý barysynda óńirdegi epidemiialyq jaǵdai jaqsarǵan jaǵdaida birqatar ónerkásiptik kásiporyndar men ShOB obektileriniń jumysyn kezeń-kezeńmen qalpyna keltirý máseleleri qaraldy. Ol boiynsha Taraz qalasy men aýdan ákimderiniń aldyna naqty mindetter qoiyldy. Eń aldymen, jergilikti atqarýshy organdar osy kásiporyndar men uiymdardyń tizimin anyqtap, olardyń árqaisysymen memorandým jasasýy kerek. Memorandýmǵa sáikes ol nysandar barlyq aldyn alý jáne epidemiologiialyq talaptardy qatań saqtaýǵa mindettelmek.
