Jambyl oblysyndaǵy áskeri bólimdegi jarylystardyń saldarynan taǵy bir áskeri qyzmetshiniń qaza tapqany belgili boldy, dep habarlaidy "Ult aqparat".
«Jambyl oblysynda órt shyqqan áskeri bólimde taǵy bir áskeri qyzmetshiniń qaza tapqany belgili boldy. Órt sóndirý komandasynyń bastyǵy, kelisimshart qyzmetiniń starshinasy 1992 jyly dúniege kelgen Nádirbekov Erkin Erikbaiuly injenerlik oq-dáriler qoimasyndaǵy órtti sóndirý jumystaryna tikelei jetekshilik jasaǵan. Jarylystan keiin oqiǵa ornynda qaza tapqan. Ol 27 tamyz kúni qaida ekeni týraly málimet joq áseri qyzmetshilerdiń qatarynda bolǵan», - delingen Qorǵanys ministrligi taratqan aqparatta.
Sonymen qatar vedomstvo qaza tapqan áskeri qyzmetshiniń otbasyna jáne jaqyn týystaryna kóńil aitady.
«Qorǵanys vedomstvosynyń basshylyǵy qaza tapqan áskeri qyzmetshiniń týǵan-týystary men jaqyndaryna zor kúizelispen kóńil aitady jáne birge aza tutady. Qorǵanys ministrligi onyń otbasyna qajetti kómek kórsetedi», - dedi ministrlikten.
Esterińizge sala ketsek, keshe saǵat shamamen 19:00-de Jambyl oblysynyń Baizaq aýdanynda ornalasqan áskeri bólim qoimalarynyń birinen órt shyǵyp, joiqyn jarylys boldy. Sonyń saldarynan osy ýaqytqa deiin 4 áskeri qyzmetshiniń qaza tapqany, 3 áskeri qyzmetshi men tótenshe jaǵdailar departamentiniń birneshe mamanymen bailanystyń joqtyǵy belgili bolǵan edi.
