Búgin Jambyl oblystyq máslihatynyń kezekten tys shaqyrylǵan 16-shy sessiiasy ótti. Sessiia qorytyndysy boiynsha, Qordai aýdanyndaǵy aýylǵa QR Prezidenti Nursultan Nazarbaevtyń anasy - Áljan ananyń esimi berildi, - dep habarlaidy Jambyl telearnasy.
Bul usynysty depýtattar biraýyzdan qoldady. Sebebi, Áljan ana - Qazaqstan Respýblikasynyń tuńǵysh prezidentin dúniege ákelgen altyn qursaqty ana. Sondyqtan, halyq qalaýlylary da bul igi bastamany barsha analarymyzǵa degen qurmettiń belgisi dep bildi, dep jazady telearna tilshileri.
"Elbasynyń rýhani jańǵyrý baǵdarlamasymen sáikes kelip otyr. Jambyl oblysynda aitýly azamatshalar ǵumyr keshken. Áiel adamdardyń orny erekshe..", - dedi Jambyl oblystyq máslihatynyń depýtaty Masat Berik.
"Kez-kelgen memlekettiń ulttyq qundylyqtary áiel balasyn qurmetteýden bastalady. Bul kisiniń atyna berilgen aýyldyń kórkemdik sipaty erekshe ádemi bolý kerek. Altyn qursaqty anaǵa degen qurmetti biz qoldaimyz. Óte oryndy...", - dedi Jambyl oblystyq máslihatynyń depýtaty Meirambek Tólepbergen.
Al, Jambyl oblysy Qordai aýdany ákimdiginiń resmi saityna osy aýdandaǵy Qasyq aýyldyq okrýginiń ataýyn "Áljan ana" dep ózgertý týraly turǵyndar jiynynyń hattamasy shyqty. Onda "Qazaqstannyń tuńǵysh prezidenti Nursultan Nazarbaevtyń anasy Jatqanbaeva Áljan Buqarbaevnanyń 1910 jyly Qasyq aýylynda molda otbasynda týǵany" jazylǵan.
Aita ketsek, aýyl osy kezge deiin deiin Qasyq dep atalyp kelgen bolatyn.
Azattyq radiosynyń habarlaýynsha, jergilikti sheneýnikter Qasyq aýylynyń ataýyn ózgertý týraly sheshimdi tek ádilet júiesinde tirkeý ǵana qalǵanyn jetkizgen.
"Aty-jónin jasyrǵan, biraq óziniń depýtat emes, máslihat qyzmetkeri retinde tanystyrǵan áiel adam Qasyq aýylynyń ataýyn ózgertý týraly sheshimdi tek ádilet júiesinde tirkeý ǵana qalǵanyn aitady.
- Keshe 28 depýtat qatysqan máslihat sessiiasynda qaraldy, depýtattardyń barlyǵy Qasyq aýylynyń ataýyn ózgertýdi qoldap daýys berdi. Biraq bul másele - búgin, ne keshe kóterilgen másele emes. Birinshi aýyldyq okrýg adamdary usynyspen aýyl ákimine barady, sosyn olar birneshe jinalys ótkizedi. Ony onomastika komissiiasy quptaýy kerek. Odan aýdan máslihaty qaraidy. Aýdan máslihatynan keiin oblys ákimine usynys jasalady. Ákim ol hatty qarap, qaýly qabyldaidy, sony bizge (oblystyq máslihatty aitady - red.) beredi, - deidi.
Máslihat qyzmetkeri munyń "halyq pikirin eskere otyryp qabyldanǵan sheshim" ekenin aitady", - dep jazady Azattyq.
