31 mamyr kúni keshke Jambyl oblysy Politsiia departamentiniń basshysy Janat Súleimenov Jýaly aýdanyndaǵy blokbeketti jabýǵa qatysty. 1 maýsymnan bastap Jambyl oblysynda oblys jáne aýdandyq eldi mekender arasyndaǵy blok-beketter alyndy, - dep habarlaidy oblystyq PD.
Oblystyq Politsiia departamentiniń basshysy blok-bekettegi qyzmetkerler aldynda sóz sóilep, QR IIM ministri Erlan Turǵymbaev pen Jambyl oblysynyń ákimi Berdibek Saparbaevtyń atynan óz úiinen, otbasynan, dala jaǵdaiynda táýlik boiy jan aianbai qyzmette turǵan politsiia jáne meditsina qyzmetkerlerine, áskeri qyzmetshiler men eriktilerge turǵyndardyń densaýlyǵy men qaýipsizdigin saqtaýdaǵy qajyrly eńbekteri úshin alǵysyn bildirdi.
Saltanatty túrde J.Súleimenov barlyq qyzmetkerlerge alǵys hattar tabys etti.
Jýaly aýdandyq ortalyq aýrýhanasynyń aǵa medbikesi Alma Jumamurat pen volonter Sholpan Jalǵasbai blokbeket jumysynyń aiaqtalýyna bailanysty Politsiia departamentiniń basshysyna blok-bekette qyzmet etken qiyn ýaqytta kórsetken jan-jaqty qoldaýy men qamqorlyǵy úshin alǵystaryn bildirdi. Olar aldaǵy jumysta da óz áriptesterine densaýlyq jáne tabys tiledi.
Týystary men jaqyndary kútip otyrǵan politsiia qyzmetkerleriniń de blok-bekettegi jumys ýaqytynyń sońǵy saǵattaryndaǵy qýanyshtary kórinip turdy.
– Bizdiń qyzmetimizge túsinistikpen qarai bilgen adamdarǵa rizamyz, – dedi Jýaly APB JPQb aǵa ýchaskelik politsiia inspektory Erjan Saýryqov – Bizdiń qyzmetimizge barlyq jaǵdai jasap, eńbegimizdi baǵalaǵany úshin QR IIM ministri Erlan Turǵymbaevqa alǵysymyzdy aitamyz, – dep atap ótti.
Statistikaǵa sáikes, 31 naýryzdan 30 mamyrǵa deiingi aralyqta Jambyl oblysynyń blok-beketteri arqyly 800 myńnan astam adam jáne 700 myń kólik ótti.
Karantin kezinde oblystyq jáne aýdandyq blok-beketterde 216 politsei, 115 meditsinalyq qyzmetker, 112 áskeri qyzmetshi jáne 37 ákimshilik qyzmetkerleri qyzmet atqardy.
