«Atameken» QR UKP Tóralqa Tóraǵasy Timýr Qulybaev Kásipkerler palatasy Óńirlik keńesiniń otyrysyna qatysty. Is-sharaǵa Jambyl oblysynyń ákimi Asqar Myrzahmetov, memlekettik organdar men óńir biznesiniń ókilderi qatysty. Bul týraly palatanyń resmi saity jazdy.
Ulttyq kásipkerler palatasynyń biznesti qorǵaý baǵytyndaǵy jumysynyń nátijesi týraly aitqan Timýr Qulybaev «Atameken» Ulttyq kásipkerler palatasy Bas prokýratýra, Memlekettik qyzmet isteri jáne sybailas jemqorlyqqa qarsy is-qimyl agenttigi, sondai-aq Joǵarǵy sotpen bailanys ornatqanyn atap ótti.
«Kásipkerlerdiń isi sotta qaralǵanda kóp jaǵdaida is memlekettik organdardyń paidasyna sheshiledi. Byltyr bul tájiribeni birlesip zertteý jáne joiý úshin Joǵary sotpen Jol kartasyna qol qoidyq. Jalpy aitatyn bolsaq, «Atameken» jumys istegeli beri Ulttyq palataǵa 22 myńnan asa ótinim kelip tústi, onyń 40%-ǵa jýyǵy oń sheshildi. Osylaisha, 92 mlrd teńgeden astam somada kásipkerlerdiń múliktik quqyǵy qorǵaldy», - dep habarlady Timýr Qulybaev.
Biznesti qorǵaýǵa óńirlik deńgeide de basymdyq berilgen.
Óńirlik kásipkerler palatasynyń direktory Máripbek Shákerbek óziniń sózinde Palataǵa biznesmender shaǵymdanǵannan keiin jyl basynan beri alty sheneýnik – tártiptik jaýapkershilikke, bir sheneýnik ákimshilik jaýapkershilikke tartylǵanyn habarlady. Byltyr Jambyl oblysy kásipkerler palatasyna 162 ótinim túsken, onyń ishinde 59 ótinim oń sheshildi. Kásipkerlerdiń 2,5 mlrd teńgege múliktik quqyǵy qorǵalǵan.
Sonymen qatar shaǵyn jáne orta kásipkerliktiń óńir ekonomikasyna salǵan aitarlyqtai úlesi de atap ótildi. Byltyr biznesten jalpy somasy 28,5 mlrd teńge salyq túken, iaǵni oblys biýdjetiniń 35%-yn quraǵan.
Kásipkerler palatasy ákimdikpen birlesip, saýda oryndarynyń syrtqy sipatyna biryńǵai standart pen talap qoia otyryp, bizneske saýdasy úshin bos oryndardy berý baǵdarlamasyn daiyndaýda. Sonymen qatar óńirde kommýnikatsiiasy júrgizilgen oryndardy jalǵa beretin shaǵyn indýstriialyq aimaq qurý máselesi de talqylaný ústinde.
Jambyl oblysynda Ulttyq palatasynyń bastamasymen qolǵa alynǵan «Bastaý» jobasy sátti júzege asyrylyp otyr. 2017 jyly óńirde 1125 azamat kásipkerlik negizderi boiynsha bilim aldy. Biyl bul kórsetkishti eki esege ulǵaitý kózdelgen. Sonymen qatar Jambyl oblysynyń eń az degende 500 azamaty jeke kásibin ashady dep kútilýde.
