Áleýmettik jelide Jambyl oblysynda aýyl ákimi kóshege óz ákesiniń atyn bergizgendigi týraly jazba kópshilik nazaryn aýdartqan bolatyn. Facebook-tegi jazba avtory - QR Parlamentiniń eks-depýtaty Muhtar Tinikeev. Aitýynsha, aýyl sheneýnigi óz ákesiniń esimin berý úshin Alash ardaqtysy Sáken Seifýllin atyndaǵy kóshe ataýyn ózgertken, dep habarlaidy "Ult aqparat".
«Jambyl oblysy Myńaral aýylynda S. Seifýllin atyndaǵy kósheni óziniń ákesi nemese týysy S. Qashqynbekovtiń atyna aýystyrǵan. Múmkin ol aýylǵa eńbegi sińgen adam shyǵar, biraq ákimderdiń óz týystaryna kóshe ataýyn bergizýi qashan toqtaidy? Iia, men de S. Seifýllinniń rýy toqa rýynanmyn. Biraq men qazaqty rýǵa, júzge nemese naǵyz qazaq dep bólmeimin. Alaida, men tarihi tulǵanyń esimi berilgen kóshe ataýynyń ózgerýine qarsymyn», - dep jazdy M. Tinikeev.
Myńaral aýyly qaraityn Moiynqum aýdanynyń ákim orynbasary Amangeldi Námetqulovtyń sózinshe, tarap jatqan aqparat shyndyqqa janaspaidy.
«Atalǵan jaǵdaidan keiin arhiv qujattaryn qaita qaradyq. Bul kóshe buryn aýyl turǵyndarynyń ótinishimen aýysqan. Seifýllinniń atyn eshkim alyp tastaǵan joq. Ardagerge berilgen kóshe shet jaqta, ol kóshede buryn ataý bolmaǵan»,- dedi aýdan ákiminiń orynbasary Amangeldi Námetqulov.
Al, Jambyl oblysy ákimdiginiń málimetine súienetin bolsaq, atalǵan sheshimdi sol kezdegi aýyl ákimi shyǵarǵan eken. Búginde M.Tinikeevtiń jazbasy boiynsha qyzmettik tekseris bastalǵan.
«Myńaral aýyldyq okrýgi ákiminiń 2003 jylǵy 18 qyrkúiektegi №21 sheshimimen Myńaral aýylynda (qazirgi aýyl) eńbek jáne soǵys ardageri Sarshóken Qashqynbekovtiń qurmetine bir kóshege esimi berilgen. Myńaral stantsiiasyndaǵy shaǵynaýdannnyń taǵy bir kóshesi Sáken Seifýllin esimimen áli de atalady.
Iaǵni, atalǵan sheshimge sáikes S.Seifýllin atyndaǵy kóshe S.Qashqynbekov kóshesi bolyp ózgertilmegen.
Sondai-aq, azamat M.Tinikeevtiń atalǵan fakti boiynsha jazbasyna bailanysty Jambyl oblysy ákiminiń apparaty qyzmettik tekseris belgiledi», - delingen habarlamada.
