Foto: elements.envato.com
Jambyl oblysy Sarysý aýdanynyń ortalyǵy Jańatasta 12 jastaǵy qyz 55 jastaǵy er adamnan júkti bolyp, túsik jasatqan. Oqiǵanyń mán-jaiyn Sputnik Qazaqstan tilshisine qyzdyń anasy aityp berdi.
"Biz turatyn úidiń birinshi qabatynda 15 jastaǵy bir qyz turady. Sol qyz meniń 11 jastaǵy qyzyma jumys taýyp beremin dep bir jerge aparǵan. Bul - 2021 jyly bolǵan oqiǵa. Ol kezde qyzym Baiqadamdaǵy mektep-internatta oqyǵan. Qyzym jazǵy kanikýlǵa kelgen kezde aiaqasty soqyr ishek bolyp aýyrdym. Sol kezde jańaǵy kórshi qyz qyzymdy ertip áketip, bir jerge jumysqa aparady. Ol jerde 700 gramdyq ydystarǵa bal quiady eken. Qyzym baldy birese az quiady, birese kóp quiady. Kórshi qyzǵa jumys berýshi er adam "mynanyń qolynan túk kelmeidi, endi ákelme" degen. Biraq qyzyma "men ótirik aita saldym, sen kelip tur" depti. Osylaisha qyzyma qyryndap júrgen", - deidi jábirlenýshi qyzdyń anasy.
Áiel sol kezde jumyssyz júrgen. Aitýynsha, 11 jastaǵy qyz eki kúnde bir bal quiýǵa baryp turǵan.
"Er adam qyzyma uialy telefon satyp ápergen. Qyzym únemi joq bolyp ketetin. Qaida júrsiń dep surasam, qyzdarmen qydyryp júrmin dep jasyryp aitpady. Bir aidan soń qyzym er adamǵa qaityp barmaǵan. Al 2022 jyly ol "uialy telefonnyń qunyn qashan tóleisiń" dep artynan qalmaǵan", - deidi jasóspirimniń anasy.
Sóitip qyz bal quiatyn jumysyna qaita barǵan.
"Bir kúni qyzym jylap keldi. Sóitsem, jumys berýshi zorlap tastaǵan. Kiiminiń bári bylǵanǵan. Tósek-orny bylǵanǵan. Ne boldy dep surap edim, aitpady. Murnym qanady dedi. Tósek orny men ish kiimin qoqysqa laqtyryp tastady. Úsh kún ornynan turmai jatyp aldy. Ótken jyly tamyz aiynda Tarazǵa bardyq. Jańaǵy erkek sol jerde júr eken. Qyzym bazarǵa baryp sýmka alamyn dep qoimady. Oǵan aqsham bolmady. Al ana er adam "men sýmka áperemin, sosyn birtindep tóleisińder" dedi de sýmka áperdi", - deidi jábirlenýshiniń anasy.
Qyzynyń júkti ekenin áiel mektep direktorynan estigen. Áieldiń aitýynsha, oqýshynyń jaǵdaiyn kórip kúdiktengen muǵalimder ony teksertken.
"Qyzym ol er adammen jarty jyl aralasqan, óitkeni qorqytqan. Sol satyp ápergen zattary úshin aqy suraǵan. Al qyzym byltyr qarashada túsik jasatty. Qarataýdaǵy qarapaiym aýrýhana, dáriger egde jastaǵy er adam boldy. Ol túsik jasardan buryn tolǵaq shaqyratyn dári ishý kerektigin aitty. Ol kezde júktilik 6 ai bolyp qalǵan", - deidi anasy.
Aýrýhanaǵa psiholog pen meiirbike kirgizgen, al anasy kólikte kútip otyrǵan.
"Maǵan mektep direktory "aryz jazba, basyńdy qatyryp qaitesiń. Qyzyń túsik jasatyp, sabaq oqyp júre beredi. Túsikke ótinish jaz, eshbir qarsylyǵym joq dep" dedi. Qandai qaǵazǵa qol qoiǵanymdy da bilmeimin. Ol er adam balabaqshada kúzetshi bolyp isteidi, al áieli - basqa balabaqshada meńgerýshi, aýdandyq maslihattyń depýtaty", - deidi áiel.
Jábirlenýshiniń ákesi túrmede jazasyn ótep júr, al anasy ekinshi ret kúieýge tigen. Ol qaitys bolǵan. Qazir basqa bir adammen azamattyq nekede turady. Nege ekeni belgisiz, jábirlenýshiniń otbasy quqyq qorǵaý organdaryna túsik jasatqannan keiin bes aidan soń, iaǵni biyl mamyrda ǵana aryz jazǵan.
"Meniń aryzdy kesh bergen sebebim jańaǵy erkek qyzyma tiiskenin qoimai, satyp ápergen telefonnyń aqshasyn surap mazalady. Qanshama ret bizge qysym kórsetti", - deidi qyzdyń anasy.
Politsiianyń habarlaýynsha, qylmystyq is sotqa joldanǵan.
"Tergeý barysynda 12 jastaǵy qyzdyń júkti bolǵany anyqtaldy. Ony mektep basshylyǵy jasyrǵan. Tiisti oryndarǵa habarlamai, túsik jasatylǵan. Qazir kúdikti qamaýǵa alyndy. Mektep basshylyǵyna qatysty Qylmystyq Kodekstiń 434-baby "Qylmys týraly habarlamaý" boiynsha tergeý júrip jatyr", - deidi Jambyl oblysy Politsiia departamenti basshysynyń orynbasary Almas Salamatov.
