Jambyl oblysyna koronavirýsqa qarsy ekpeniń ekinshi kezeńi úshin, iaǵni muǵalimderdi egýge «Spýtnik V» vaktsinasynyń 5250 dozasy jetkizildi. Bul týraly Óńirlik kommýnikatsiialar qyzmetiniń aqparat alańynda ótken brifingte oblystyq Densaýlyq saqtaý basqarmasynyń basshysy Áset Qaliev aitty, dep habarlaidy "Ult aqparat".
Jambyl oblysynda vaktsinalaýdyń 1-shi kezeńi boiynsha 850 meditsina qyzmetkeri reseilik «Spýtnik V» vaktsinasynyń 1-komponentimen egildi. Olar osy aralyqta ekinshi ret, iaǵni 21 kúnnen keiin «Spýtnik V» vaktsinasynyń 2-komponentin aldy.
Aimaqtyń bas dárigeriniń aitýynsha, vaktsinadan keiin adamdardan keri áserler baiqalmaǵan. Al 2 naýryzda «Qaraǵandyfarm» zaýyty bazasynda óndirilgen «Spýtnik V» vaktsinasynyń 5250 dozasy Shymkent qalasy arqyly Jambyl oblysyna jetkizildi. Qazir atalǵan preparattar vaktsinalaýdyń 2-kezeńin ótkizý úshin Densaýlyq saqtaý basqarmasynyń qoimasynda tur. Jalpy ekpeniń 2-shi kezeńinde vaktsina jalpy bilim beretin mektepterdiń, birinshi kezekte bastaýysh synyptardyń muǵalimderine salynady. Alǵashqy kezeńnen tys qalǵan meditsina qyzmetkerleri de qamtylatyn bolady.
Vaktsinanyń túsýine qarai ekpeniń úshinshi kezeńinde stýdentter, bilim berý mekemeleriniń, mektepke deiingi balalar mekemeleriniń, meditsinalyq-áleýmettik mekemelerdiń, quzyrly qurylymdardyń qalǵan barlyq qyzmetkerleri, sondai-aq halyq sanaǵymen ainalysatyn qyzmetkerler jáne sozylmaly aýrýlary bar adamdar qamtylatyn bolady.
«Búgingi tańda koronavirýs infektsiiasyna qarsy vaktsinalaýdyń 1 jáne 2-kezeńin ótkizý úshin oblysta 20 emdeý mekemesi, onyń ishinde Taraz qalasynyń 9, Shý qalasynyń jáne oblystyń 10 aýdandyq emhanalary jumys isteýde. Barlyq jumyldyrylǵan emhanalarda egý jumystaryn júrgizý sanitarlyq-epidemiologiialyq normalar men erejelerdiń talaptaryna sáikes júzege asyrylady» — dedi, Á. Qaliev.
Aita ketý kerek, jospar boiynsha Jambyl oblysynda biyl vaktsinanyń túsýine qarai 18 jastan asqan 593 700 adam ekpe jasata alady. Bul – oblys halqynyń jalpy sanynyń 52 paiyzy degen sóz. Budan basqa, keiinnen halyqtyń qosymsha osal toptaryn qosa otyryp, kontingentti keńeitý josparlanýda.
Buǵan deiin habarlaǵanymyzdai, búgin óńirdiń bilim salasy qyzmetkerlerine vaktsina jasaý bastalyp ketti.
