Májilistegi Úkimet saǵatynda QR Qarjy ministri Erulan Jamaýbaev aýyl sharýashylyǵy salasyndaǵy sýbsidiialardy berýdiń ashyqtyǵyn qamtamasyz etý týraly suraqqa jaýap berdi, dep habarlaidy QazAqparat.
«Jaqyn arada aýyl sharýashylyǵy salasyndaǵy sybailas jemqorlyq janjalyna kýá boldyq. Ol kásipkerlerdi sýbsidiialaýǵa bólingen qarajatty urlaýmen bailanysty. Osy fakti boiynsha Memleket basshysy aýyl sharýashylyǵy kásiporyndaryn qoldaýdyń barlyq júiesine keshendi taldaý júrgizýdi tapsyrdy. Bul protsesterdiń ashyqtyǵyn qamatamasyz etýge jáne sýbsidiialardy alýdyń negizsiz jaǵdailaryn bolǵyzbaýǵa elektrondy shot-faktýralar ári astyq qolhattary aqparattyq júielerin integratsiialaý yqpal etken bolar edi. Alaida ol áli de aiaqtalǵan joq. Aýyl sharýashylyǵy sýbsidiialaryn berýdiń zańdylyǵy men ashyqtyǵy máselesi qanshalyqty ótkir ekenin eskere otyryp, aqparattyq júielerdi tolyqqandy integratsiialaýdyń naqty merzimi qashan?», - dep surady Májilis depýtat Ámirhan Rahymjanov.
Óz kezeginde ministr Erulan Jamaýbaev Sybailas jemqorlyqqa qarsy is-qimyl agenttigi qyzmetiniń arqasynda sýbsidiialaýǵa qatysty biraz zańsyzdyq áshkere bolǵanyna toqtaldy.
«Bul baǵytta aýyl sharýashylyǵy salasy boiynsha tiisti jumystardy atqaryp jatyrmyz. Birinshiden, jalpy osy sýbsidiialardyń qanshalyq tiimdiligi pysyqtalýda. Ózimizdiń aqparattyq júiede, biýdjetti qalyptastyrǵan kezde sýbsidiianyń tiimdiligin eskeretin bolamyz. Ekinshiden, ádisteme máselesi bar. Sýbsidiiaǵa qatysty ádisteme birneshe ret ózgerýi múmkin. Bul baǵytta da biraz syn aitylǵan bolatyn. Tekserýlerdegi sońǵy jaǵdailarǵa bailanysty ádisteme qaitadan qaralyp, qabyldanatyn bolady», - dedi vedomstvo basshysy.
«Jalpy, kirister komitetiniń aqparattyq júieleri osy jyldyń qyrkúiek aiynda integratsiiaǵa daiyn bolǵan. Biz bul týraly birneshe ret Aýyl sharýashylyǵy ministrligine hat jazyp, joldadyq. Osy jaiynda Aýyl sharýshylyǵy ministrimen de sóilestim. Olardyń aitýyna qaraǵanda, agenttiktiń tekserýi aiaqtalǵannan keiin solardyń usynystaryn alyp, ádistemeni durystaǵan kezde, bizdiń júiege tolyq integratsiia iske asyrylady», - dedi Jamaýbaev.
