Jyl basynan beri politsiia organdary jalǵan vaktsina pasporty men PTR anyqtamalary úshin 86 qylmystyq is qozǵady. Bul týraly QR Ishki Ister ministriniń orynbasary Arystanǵani Zapparov aityp berdi, dep habarlaidy QazAqparat.
Onyń aitýynsha, internet-resýrstardy monitoringileý boiynsha jumystar júrgizilýde. IIM jáne onyń aýmaqtyq bólimshelerinde jalǵan qujattardy satý týraly habarlandyrýlardy anyqtaý boiynsha turaqty monitoring toptar jumys isteidi.
«Máselen, áleýmettik jeliler men messendjerlerde jalǵan vaktsinalaý pasporttaryn nemese PTR anyqtamalardy satý týraly 62 habarlandyrý anyqtaldy. Ázirge olardyń 29-y buǵattalǵan. Sonymen birge jalǵan qujat satyp alýǵa tyrysyp, alaiaqtardyń qurbanyna ainalýǵa bolatynyn atap ótken jón», - deidi A. Zapparov.
Politsiia qyzmetkerleri meditsinalyq ortalyqtardy, emhanalardy, vaktsina alý pýnktterin tekserýdi jalǵastyrýda.
«Jyl basynan beri politsiia organdary 86 qylmystyq is qozǵady, onyń 39-y vaktsinalaý pasportyn jáne 47-si PTR-anyqtamany qoldan jasaǵany úshin jaýapqa tartyldy. Qylmystyq kodekstiń 385-baby – jalǵan qujattardy, mórtabandardy, mórlerdi, blankilerdi jáne t.b. qoldan jasaý, daiyndaý nemese ótkizý boiynsha 4 jylǵa deiin bas bostandyǵynan aiyrý, al ony paidalanǵany úshin 40 táýlikke deiin qamaýǵa alý qarastyrylǵan. Osyǵan bailanysty IIM saqtyq sharalaryn ustanyp, zań buzýshylyqqa jol bermeýge shaqyrady», - deidi Arystanǵani Zapparov.
