Ondaǵan jyldar boiy Qazaqstanda aýa temperatýrasynyń kóterilý normasy álem elderinen áldeqaida joǵary bolyp otyr. Bul týraly «Qazgidromet» RMK Bas direktorynyń orynbasary Serik Saiyrov málim etti, dep habarlaidy QazAqparat.
«Keiingi 40 jylda Qazaqstanda aýa temperatýrasy orta eseppen ár 10 jyl saiyn 0,32°S joǵarylap otyrdy. Bul – jer shary boiynsha aýa temperatýrasynyń kóterilý normasynan áldeqaida kóp. Dúniejúzindegi ortasha ósý qarqyny – 0,18°S deńgeiinde, iaǵni jahandyq jylyný deńgeii álem boiynsha Qazaqstanda óte joǵary. Al, 2021 jyl elimizdegi eń jyly bes jyldyqqa kirip otyr. Kórsetkish anomaliialyq ózgeris engenge deiingi ortasha jyldyq temperatýradan 1,5°S artyq. Sondai-aq, jazda aptap ystyqtyń qaitalanýy jiilep keledi. Qurǵaq aimaqtarǵa jańbyr jaýý uzaqtyǵy artyp barady. Respýblika boiynsha kúndizgi jáne túngi aiazdardyń jiiligi tómendei bastady», - dedi Serik Saiyrov.
Sonymen qatar, sońǵy 35 jylda Qazaqstanda gidrologiialyq qubylystar da jiilegen. «Qazgidromet» málimetinshe, sý tasqyny qaýpi orta eseppen 42 oqiǵaǵa kóbeidi. Budan ózge Serik Saiyrov Kaspii teńiziniń tartylyp bara jatqanyna toqtaldy.
«Kaspii teńiziniń deńgeii qazirgi kezde 28,68 m tómendep, 23 myń sharshy shaqyrymǵa tartyldy. Al, Balqash kóliniń tolqýy 342,5 m deńgeiinde. Balqashta shuǵyl ózgerister joq. Kaspii teńizi qatty taiazdap ketti», - dep málimdedi «Qazgidromet» RMK Bas direktorynyń orynbasary.
Serik Saiyrovtyń aitýynsha, mundai ekologiialyq máselerdiń sebebi – jahandyq jylyný deńgeiiniń joǵarylaǵany men qorshaǵan ortaǵa degen qamqorlyqtyń joqtyǵy.
