Búgin Senattaǵy Úkimet saǵatynda elektr energiiasynyń tapshylyǵyna jol bermeý máselesi kóterildi, dep habarlaidy QazAqparat.
Senator Muhtar Qul-Muhammed qys bastalmai jatyp elimizde elektr energiiasyndaǵy tapshylyq sezile bastaǵanyn aitty.
«Osy oraida áleýmettik nysandardyń toqtaýsyz jumys isteýi, iaǵni aýrýhanalar men mektepterdiń jumysy elektr energiiasynyń úzdiksiz berilýine bailanysty. Ekinshiden, vedomstvonyń keibir túsindirmelerinde túrli elektr jelilerine qosylyp alǵan «sur» mainerler qýatty óte kóp mólsherde paidalanyp jatyr degen ýáj aittyńyzdar. Osy qanshalyqty shyndyqqa sáikes keledi jáne aldaǵy ýaqytta energiia tapshylyǵy órship ketpei me?», - dep surady M. Qul-Muhammed.
Óz kezeginde QR Energetika vitse-ministri Áset Maǵaýov mainerlerge qatysty shynymen de problama bar ekenin aitty.
«Atap aitqanda, Jambyl oblysyndaǵy jaǵdaiǵa toqtalsaq, Atomdyq jáne energetikalyq qadaǵalaý men baqylaý komiteti KEGOC kompaniiasymen birlese reviziia júrgizdi. Osy oraida Jambyl oblysy boiynsha «sur» mainingtiń 12 nysany jáne Pavlodar oblysynda osyndai bir nysan anyqtaldy», - dedi vitse-ministr.
Maǵaýovtyń aitýynsha, qadaǵalaý is-sharalarynyń nátijesinde barlyq 13 nysannyń jumysy toqtatyldy.
«Sonymen qatar KEGOC elektr energiiasyna suranys artqan kezde turǵyndardy emes, maining kompaniialardy jeliden ajyratý qadamdaryn júrgizedi. Iaǵni osy nysandar boiynsha elektr energiiasyn paidalaný júktemesi eskeriledi. Bizdińshe, osy is-sharalar qystaǵy jylý berý maýsymyn toqtaýsyz ótkizýge múmkindik beredi», - dedi ol.
Jaqynda Memleket basshysyna tsifrlyq maining salasyn baqylaý úshin qabyldanyp jatqan sharalar tanystyryldy.
Bul óz qyzmetin tirkeýsiz atqaratyn sýbektilerge qatysty. Energetika ministri Maǵzum Myrzaǵaliev «sur» mainerler shamamen 1200 MVt-qa deiin elektr energiiasyn tutynatynyn jáne olardy anyqtaý jumystary jalǵasyp jatqanyn atap ótti.
