Búgin-erteń zeinetaqy jinaǵyn baspana men bilim alýǵa jumsaýǵa múmkindik beretin naqty tetikter Prezident qaraýyna usynylady. Bul týraly búgin Úkimet úiindegi baspasóz máslihatynda QR Premer-Ministriniń orynbasary Berdibek Saparbaev aitty, dep habarlaidy QazAqparat tilshisi.
«Úkimet janynan jumys toby qurylǵan. Biz qazirgi ýaqytta usynystar ázirledik, Prezidentke usynatyn bolamyz. Túpkilikti sheshimdi Prezident qabyldaidy. Birneshe ret aitqanmyn, taǵy da qaitalap aitamyn. Zeinetaqy jinaǵyn paidalaný salymshy jinaǵynyń somasyna bailanysty bolady. Belgilengen norma bar. Iaǵni, biz tiisti esepteýlerin shyǵardyq. Birinshisi - búgingi kúnge deiin jinaqtalǵan jinaq somasy. Ekinshisi – qazaqstandyqtardyń ortasha ómir súrý uzaqtyǵy. Zeinetkerlikke shyqqannan keiin qazaqstandyq qansha jyl ómir súretindigin eseptedik. Iaǵni, salymshynyń esepshotynda qansha jylǵa jetetin jinaq bolýy qajettigin anyqtadyq», - dedi Úkimet basshysynyń orynbasary.
Onyń atap ótýinshe, salymshy zeinetaqy jinaǵynynyń belgili bir mólsherin baspana satyp alýǵa nemese bilim alýǵa jumsaýy úshin onyń esepshotynda qalatyn soma 75 jasqa deiin ómir súrýine jetkilikti bolýy qajet.
«Búgin-erteń óz usynystarymyzdy Prezident ákimshiligine beremiz jáne Prezident tarapynan sheshim qabyldanady», - dedi Berdibek Saparbaev.
Premer-Ministrdiń dereginshe, 9 mln 600 myń salymshynyń 10 trln teńge jinaǵy bar. Ortasha eseppen bir salymshynyń esepshotynda 1 mln teńge ǵana jinaqtalǵan.
«Bizdiń esebimizshe, salymshy zeinetke shyqqannan keiin jaqsy ómir súrýi úshin esepshotynda 11-12 mln teńge qarajaty bolýy kerek. Jalpy, árbir qazaqstandyń jinaǵyna qatysty naqty esebimiz bar», - dedi ol.
Eske sala ketsek, Memleket basshysy Qazaqstan halqyna Joldaýynda Úkimetke azamattardyń zeinetaqy jinaqtaryn baspana alýǵa jumsaýyn retteýdi tapsyrǵan bolatyn.
