Jetisý oblysynyń Qaratal aýdanynda kólik júrgizý quqyǵynan aiyrylǵan 25 jastaǵy er adam mas kúiinde rólge otyrǵan, dep habarlaidy ult.kz.
Polisia.kz málimetinshe, Úshtóbe qalasynda patrýldik politsiia qyzmetkerleri Nissan Patrol kóligin toqtatqan. Tekserý kezinde júrgizýshiden masańdyq belgileri baiqalyp, meditsinalyq kýálandyrý onyń alkogol ishkenin rastady.
Politsiia onyń buǵan deiin sot sheshimimen jeti jylǵa kólik basqarý quqyǵynan aiyrylǵanyn anyqtady. Soǵan qaramastan, júrgizýshi alkogol ishkennen keiin qaitadan kólik tizgindegen.
Atalǵan derek boiynsha sotqa deiingi tergep-tekserý bastaldy. Kúdikti ýaqytsha ustaý izoliatoryna qamaldy.
Politsiia júrgizýshilerdi jol qozǵalysy erejelerin qatań saqtap, kólik basqarýǵa jaýapkershilikpen qaraýǵa shaqyrdy.
