Qazaqstanda 7 qyrkúiekten bastap azamattar zeinetaqy jinaǵyn tolyq kólemde jeke basqarýshy kompaniialardyń senimgerlik basqarýyna bere alady. Buǵan deiin jinaqtyń 50 paiyzyn ǵana aýdarýǵa ruqsat etilgen, dep habarlaidy ult.kz.
Bul jaǵdaida jetkiliktilik shegi eskerilmeidi. Qazir zeinetaqy aktivterin basqarýǵa bes kompaniia quqyly: BCC Invest, Sentras Sekiýritiz, Alatau City Invest, Halyk Finance jáne Tansar Capital.
Ulttyq bank basshysy Timýr Súleimenovtiń aitýynsha, jeke basqarýshy kompaniialar shaǵyn ári ikemdi bolǵandyqtan, investitsiialyq múmkindikterdi jyldam paidalana alady. Alaida joǵary tabysqa umtylǵan azamat táýekeldi de eskerýi kerek.
Salymshy basqarýshy kompaniiany jylyna bir ret aýystyra alady. Jinaqty Ulttyq banktiń basqarýyna qaitarý úshin keminde bir jyl kútý qajet.
Ótinishti BJZQ saity, mobildi qosymshasy nemese óńirlik bólimsheleri arqyly berýge bolady. Qarajat 30 kún ishinde senimgerlik basqarýǵa aýdarylady.
Basqarýshy kompaniia bankrot bolǵan jaǵdaida zeinetaqy aktivteri Ulttyq banktiń basqarýyna qaitarylady.
Salymshylar basqarýshy kompaniialardyń investitsiialyq strategiiasy men kiristiligin BJZQ saitynan kóre alady.
Mańyzdysy: bul ózgeris zeinetaqy aqshasyn qolma-qol sheship alýǵa emes, ony tolyq kólemde investitsiialyq basqarýǵa berýge múmkindik beredi.
