Almatyda aýlaǵa shlagbaým ornatýǵa qatysty jańa talaptar kúshine endi. Endi turǵyndar tosqaýyldy óz betinshe ornata almaidy. Ol úshin birqatar talapty oryndap, aýdan ákimshiliginiń kelisimin alý qajet. Bul týraly KTK habarlady, dep habarlaidy ult.kz.
Jańa erejeler 16 tamyzdan bastap qoldanysqa engizildi. Oǵan sáikes, ornatylatyn shlagbaým qaýipsizdik talaptaryna sai bolýy jáne apattyq ári kommýnaldyq qyzmetterdiń aýlaǵa kedergisiz kirýine múmkindik berýi tiis. Qurylǵy tótenshe jaǵdaida avtomatty túrde ashylatyn júiemen jabdyqtalýy kerek.
Almaty qalalyq jol qozǵalysy jáne jolaýshylar kóligi departamentiniń málimetinshe, shlagbaým ornatý týraly sheshimdi kondominiýmnyń ortaq menshigindegi aýmaqta turatyndar qabyldai alady. Ol úshin múlik ieleriniń úshten ekisinen astamynyń kelisimi qajet. Budan keiin aýdan ákimshiliginen ruqsat alynýy tiis.
Turǵyndar bul talaptardyń aýlalardaǵy kólik qozǵalysyn retteýge múmkindik beretinin aitady. Máselen, Sergei Kimniń aitýynsha, onyń aýlasy kólik júrgizýshileri keptelisti ainalyp ótý úshin paidalanatyn jolǵa ainalǵan. Sonyń saldarynan balalar oinaityn aýmaqta kólik kóp júredi.
Qalada burynnan ornatylǵan shlagbaýmdar birden alynyp tastalmaidy. Alaida olardyń ieleri belgilengen tártippen qaita rásimdeýden ótip, qurylǵylaryn jańa talaptarǵa sáikestendirýi qajet.
Tótenshe jaǵdailar qyzmeti jabyq aýlalarǵa kire almai qalatyn jaǵdailar bar ekenin aityp otyr. Sondyqtan jańa talaptardyń basty maqsaty – órt sóndirý jáne jedel járdem kólikteriniń turǵyn úilerge kedergisiz jetýin qamtamasyz etý.
Almaty qalalyq Tótenshe jaǵdailar departamentiniń ókili Rýslan Qasenovtiń aitýynsha, mamandar shlagbaýmdardyń tótenshe jaǵdai kezinde avtomatty ashylýyn qamtamasyz etetin dybystyq detektorlardy ornatý boiynsha jumystar júrgizip jatyr.
Jańa talaptardy buzyp, shlagbaýmdy zańsyz ornatqan turǵyndarǵa jaýapkershilik qarastyrylǵan. Kógaldandyrý erejelerin buzǵany úshin 86 myń teńgege deiin aiyppul salynýy múmkin.
