Shyǵys Qazaqstannyń Tarbaǵatai aýdanynda eki balyqshy joǵalyp ketti. Bul týraly "Ult aqparat" ShQO Tótenshe jaǵdailar departamentine silteme jasap habarlaidy.
41 jáne 26 jastaǵy balyqshylar 6 qyrkúiek kúni ketkennen úilerine oralmaǵan. Olar mingen qaiyq Zaisan kólinen tabylǵan. Soǵan qarap, balyqshylar batyp ketti degen boljam aitylýda.
«Júzý quraly jaǵadan bir shaqyrym jerden tabyldy. Balyqshylardy kórgenderdiń aitýynsha, qaiyqta qutqarý keýdeshesi men sheńber bolmaǵan. Al jas balyqshy júzý bilmegen. Oqiǵa ornyna Óskemennen súńgýirler bardy. Olar jaǵadan 10-15 shaqyrym aýmaqta 15 metr tereńdikke deiin izdeý jumystaryn júrgizip jatyr. Sý astyndaǵy izdeý kún saiyn qas qaraiǵansha jalǵasady», - delingen departamenttiń baspasóz qyzmeti taratqan málimette.
Izdeý jumystaryna mańaidaǵy aýyldardan erikti turǵyndar da tartylǵan. Áýeden de tikushaq arqyly izdeý júrip jatyr.
