Taldyqorǵanda áleýmettik jelige jariialanǵan qaýipti videoǵa bailanysty birneshe adam ákimshilik jaýapkershilikke tartyldy, dep habarlaidy ult.kz.
Jetisý oblysy politsiiasynyń áleýmettik jelilerge júrgizgen monitoringi barysynda 19 jastaǵy jergilikti turǵynnyń qatysýymen túsirilgen beinerolik anyqtalǵan. Onda boijetken avtokólik qozǵalys kezinde oiyn-saýyq oryndarynyń birin jarnamalap, kóliktiń terezesinen syrtqa shyǵyp, sýsyn iship, keiin qoqysty jol boiyna laqtyrǵan.
Tekserý nátijesinde videoǵa qatysy bar barlyq azamat anyqtaldy. Boijetken qoǵamdyq oryndy lastaǵany úshin ákimshilik jaýapkershilikke tartyldy. Al kólik júrgizýshisine jolaýshylardy tasymaldaý qaǵidalaryn buzǵany jáne jol tańbasynyń talaptaryn saqtamaǵany úshin ákimshilik hattama toltyryldy.
Politsiia ókilderi áleýmettik jelidegi tanymaldyqqa umtylý zań talaptaryn buzýǵa jáne jol qozǵalysy qaýipsizdigine qaýip tóndirýge sebep bolmaýy kerektigin eskertti. Vedomstvonyń málimetinshe, mundai áreketter quqyqbuzýshylardyń ózine ǵana emes, ózge jol qozǵalysyna qatysýshylarǵa da qaýip tóndirip, qorshaǵan ortaǵa ziian keltiredi.
Quqyq qorǵaý organdary mundai zańbuzýshylyqtardy anyqtaý jumystary respýblikalyq «Taza Qazaqstan» ekologiialyq aktsiiasy men «Zań jáne tártip» qaǵidaty aiasynda turaqty túrde jalǵasatynyn atap ótti.
