Qazaqstandyq tennisshi Zarina Diias Japoniiadaǵy Gifý ITF týrniriniń jeńimpazy atandy, dep habarlaidy QazAqparat tilshisi.
Osy týrnirdiń úshinshi, álemniń 115-raketkasy Z.Diias finalda reitingte 190-orynda turǵan taivandyq En Sho Lianmen kúsh synasty.
Qazaqstandyq tennisshi qarsylasyn 6:0, 6:2 esebimen oisyrata jeńdi.
Báseke bir saǵattan sál astam ýaqytqa sozyldy.
Osylaisha Zarina Diias júlde qory 80 myń AQSh dollaryna baǵalanǵan jarystyń chempiony atandy.
Jalpy, Zarinaǵa japon jeri jaǵady deýge bolady. Budan eki jyl buryn qazaqstandyq tennisshi Tokio týrniriniń jeńimpazy atanǵan edi. Bul onyń WTA týrnirlerindegi alǵashqy jeńisi bolatyn. Atalmysh tabys ázirge jalǵyz bolyp tur. Endi aldaǵy ýaqytta osyny jalǵastyryp, bási men deńgeii ITF-dan joǵary WTA jarystarynda sátti óner kórsetse, reitingisi de joǵarylar edi.
Osy aidyń aiaǵynda bastalatyn, tennisti tamashalaityn búkil álemniń nazary aýatyn Parijdegi Rolan Garros týrniriniń jóni tipten bólek. Iýliia Pýtintseva ekeýine sol jarysta joly bolsa, tabar tabystary da molaia túser edi.
Eske sala keteiik, budan buryn Zarina Diiastyń Gifý týrniriniń shirek, jartylai finaldarynan ótip, finalǵa joldama alǵanyn, taǵy bir qazaqstandyq Iýliia Pýtintsevanyń Madrid týrnirin jeńispen bastaǵanyn jazǵan bolatynbyz.
Taǵy bir qazaqstandyq Dmitrii Popko AQSh-taǵy Vero Bich ITF týrniriniń finalyna shyqty. Ol sońǵy básekede amerikalyq, osy týrnirdiń ekinshi, álemniń 400-raketkasy Seký Bangýra nemese Ekvador eliniń ókili Diego Idalgonyń bireýimen chempiondyq ataq úshin talasady.
