QR Ishki ister vitse-ministri Aleksei Kalaichidi zańsyz ainalymdaǵy dárilik zattardy anyqtaý jumystary týraly aityp berdi, dep habarlaidy "Ult aqparat".
«Memleket basshysynyń dárilik zattardy zańsyz saýdalaýǵa qatysty tapsyrmasy oryndalyp jatyr. 5 shildeden beri mundai 537 zańbuzýshylyq anyqtaldy, onyń 58-i boiynsha QR Qylmystyq Kodeksiniń 214-baby boiynsha sotqa deiingi tergeý bastalǵan. Qalǵandary ákimshilik óndiriske jiberildi. Politsiiaǵa 431 adam jetkizildi», - dedi spiker Ortalyq kommýnikatsiialar qyzmetinde ótken onlain brifingte.
Spikerdiń aitýynsha, zańsyz ainalymnan 70,8 myń qaptama meditsinalyq preparattar, jarty millionǵa jýyq meditsinalyq maska, 36 myń dana qolǵap pen ózge de buiymdar (qyzý ólshegish, kózdi qorǵaý quraly) jáne 705 litr antiseptik alynǵan.
«Alynǵan ónimderdiń basym kópshiligi Shymkent (19,5 myń dana buiym), Almaty (14,5 myń dana), Nur-Sultan (5 myń dana), Atyraý (11,8 myń dana) jáne Jambyl (4,2 myń dana) oblystaryna tiesili. Quqyqbuzýshylyq týraly barlyq materialdar ekonomikalyq tergeýler qyzmetine jáne densaýlyq saqtaý organdaryna jiberildi», - dedi vitse-ministr.
Zańsyz ainalymnan alynǵan meditsinalyq preparattar men buiymdar densaýlyq saqtaý organdaryna naýqastardy emdeýge jiberiledi.
