Zańdy tulǵalar bankten sheship alatyn aqshanyń shekti kólemin bekitý qajet. Bul týraly búgin Úkimettiń keńeitilgen quramdaǵy otyrysynda Memleket basshysy Nursultan Nazarbaev aitty.
«Zańdy tulǵalar bankterden sheship alatyn qolma qol aqshanyń shegin bekitý qajet. Ulttyq bankpen birge muny zerdeleý kerek. Kólik, úi syndy iri satyp alýlarda qolma-qol aqsha júrmeýi tiis. Ol jaqta jasyryn mámile bar», - dedi Elbasy.
Memleket basshysy jeke tulǵalardyń biýdjetke qomaqty aqsha qaryz ekendigin jáne ony áli kúnge ótemei otyrǵandyǵyn atap ótti.
«Búginde 1,3 mln jeke tulǵa biýdjetke kólik, múlik jáne jer salyǵyna qaryz. Bul 17 mlrd teńgeden astam qarjy, onyń 5 mlrd teńgesin eseptelingen ósimpul qurap otyr. Men buǵan deiin de aityp, Úkimetke negizgi salyqty tóleitin bolsa, onda jeke tulǵalarǵa osynaý 5 mlrd teńge ósimpuldy alyp tastaityn salyqtyq raqymshylyq júrgizýdi tapsyrǵanmyn», - dedi QR Prezidenti.
