Senat tóraǵasynyń orynbasary Bektas Beknazarov qabyldanatyn zańdar boiynsha depýtattar óz jaýapkershiligin umytpaýy kerektigin málim etti, dep habarlaidy QazAqparat.
«Senat qabyrǵasynda qabyldanǵan zańdardyń qanshalyqty jan-jaqty, tiianaqty túrde talqylanyp, durys zańyń qabyldanýy úshin jaýapty adamdardyń nazaryn aýdaratyn másele dep esepteimin. Bizdiń búgingi parlamenttik tyńdaýymyzda Úkimetke de, sonyń ishinde Ádilet ministrligine de, memlekettik organdarǵa da birshama syn aityldy. Onyń barlyǵy, árine, durys. Biraq, qurmetti áriptester, barlyǵyńyzdyń nazaryńyzdy taǵy bir nársege aýdarǵym keledi. Zańdy qabyldaityn kim? Qandai organ osy zańdardy qabyldap otyr? Shala bolsyn, asyǵys daiyndalǵan bolsyn, bul zańdardy qabyldap otyrǵan bir organ, ol - Parlament Senaty. Ol - bizdiń óz jaýapkershiligimiz. Eger qabyldanǵan zań zaman ári ýaqyt talabyna, adam quqy talabyna sáikes kelmeitin bolsa, onda oǵan, eń aldymen, kináli - osy zalda otyrǵandar», - dedi senator Parlament Senatynda zań shyǵarýshylyq protsesti jetildirý taqyrybyna arnalǵan parlamenttik tyńdaýda.
Osy oraida B. Beknazarov úlken kodeksterdiń ózi qabyldanǵan kezde aldyn ala boljamy joq qadamdar oryn alatynyn sóz etti.
«Mysaly, biz osydan biraz jyl buryn Ákimshilik quqyq buzý kodeksin qabyldadyq. Osy kodeksti talqylaǵan kezde kóptegen normalar boiynsha, iaǵni tártipti nyǵaitý máselesinde úlken somaly aiyppul belgilendi. Ol myńdaǵan adamdardyń taǵdyryna áser etti. Sodan keiin bir-eki jyldan keiin aldyq ta, sol aiyppuldardyń shamasyn eselep turyp azaittyq. Sóitip jan-jaqty daiyndalmaǵan sheshimge bardyq», - dedi ol.
Osy oraida senator alda taǵy da úlken zańdar toby kele jatqanyna toqtala kele:
«Sondyqtan, qurmetti áriptester, synaýǵa bolady, aitýǵa bolady. Biraq osynda otyrǵan áriptesterimniń nazaryn taǵy da aýdarǵym keledi. Eń aldymen, osy zańdardyń qabyldanýyna, durys sapaly bolýyna halyqtyń, Prezidenttiń aldyndaǵy ózimizdiń jaýapkershiligimizdi esten shyǵarmaiyq», - dedi Bektas Beknazarov.
