Jan Ahmadiev Merkide kóz jumǵan Madinaǵa qatysty mańyzdy málimdeme jasady , dep habarlaidy ult.kz.
“Madinanyń isine qatysty áleýmettik jelide jalǵan aqparattar tarap jatyr. Tekserilmegen áńgimelerge senbeńizder! Naqty ári resmi aqparatty tek bizdiń paraqshadan alýlaryńyzdy suraimyz. Madinaǵa ádildik — tek aqiqatpen ornaidy!”, - dedi ol.
Aita keteiik, Jambyl oblysynyń Merki aýdanynda 19 jastaǵy Madina Rashidqyzynyń ólimine qatysty jańa málimetter paida boldy. Qazir bul is boiynsha tergeý júrip jatyr.
Madina Ózbekstan azamaty bolǵan. Ol Qazaqstan azamatyna turmysqa shyǵyp, Merki aýdanynda kúieýimen birge shamamen eki jyl turǵan. Artynda segiz ailyq sábii qalǵan.
Buǵan deiin marqumnyń qurbysyna jazǵan habarlamalary jariialanǵan edi. Onda Madina kúieýimen jii janjaldasatynyn, tipti onyń qol kótergenin aitqan. Sońǵy janjaldyń bir «Barni» táttisine bailanysty bolǵanyn jazǵan. Keiin ol zattaryn jinap, kúieýinen ketip, ajyrasqysy keletinin qurbysyna jetkizgen.
Madinanyń ólimine qatysty Jambyl oblysynyń politsiiasy ózin-ózi óltirýge deiin jetkizýderegi boiynsha sotqa deiingi tergeý bastaǵan. Alaida marqumnyń týystary onyń ólimine kúmán keltirip, isti jan-jaqty tekserýdi talap etip otyr.
Áleýmettik jelide Madinanyń kúieýi tarapynan zorlyq-zombylyq bolǵany týraly túrli málimetter taraǵanymen, olardyń birqatary ázirge resmi túrde rastalǵan joq. Sondyqtan oqiǵanyń naqty mán-jaiy men ólim sebebi tergeý nátijesinde anyqtalýy tiis.
