Jambyl oblysynda Qazaqstan aýmaǵyna tańbalaýsyz temeki ónimderin zańsyz ákelip, ótkizýmen ainalysqan transulttyq uiymdasqan qylmystyq toptyń qyzmeti toqtatyldy, dep habarlaidy ult.kz.
Qarjylyq monitoring agenttiginiń málimetinshe, qylmystyq shemany Jambyl oblysynyń turǵyny uiymdastyrǵan. Ol temeki ónimderin Qyrǵyz Respýblikasynan zańsyz tasymaldaýdy jolǵa qoiyp, taýardy ózine baǵynyshty adamdar arqyly ótkizgen.
Kontrafaktilik temeki negizinen Taraz qalasyndaǵy saýda oryndarynda satylyp, keiin Almaty, Shymkent qalalaryna, sondai-aq Qaraǵandy, Aqtóbe, Shyǵys Qazaqstan jáne Túrkistan oblystaryna jóneltilgen.
Tergeý barysynda 30-dan astam tintý júrgizilip, zańsyz ainalymnan jalpy quny 293 million teńgeni quraityn 319 myńnan astam qorap tańbalaýsyz temeki tárkilendi. Al memleketke tólenbegen aktsiz kólemi 115 million teńgege baǵalanǵan.
Agenttik málimetinshe, qylmystyq top quramynda taýardy jetkizý men qarjylyq esep aiyrysýdy uiymdastyrǵan Qyrǵyz Respýblikasynyń azamattary da bolǵan. Qylmystyq kiristerdiń izin jasyrý úshin olar banktik júieden tys jumys isteitin beiresmi «Havala» aqsha aýdarý júiesin paidalanǵan.
Sot sanktsiiasymen kontrabandalyq ónimdi tasymaldaýǵa paidalanylǵan úsh avtokólikke tyiym salynyp, bes kúdikti qamaýǵa alyndy. Qazirgi ýaqytta sotqa deiingi tergeý jalǵasyp jatyr.
«Havala» degen ne?
«Havala» – bankterdi ainalyp ótetin beiresmi aqsha aýdarý júiesi. Onda aqsha bir eldegi deldalǵa beriledi, al alýshy basqa eldegi deldaldan arnaiy qupiia kod arqyly qarajatty qolma-qol alady. Keiin deldaldar ózara esep aiyrysady. Mundai júie kóbine qarjy qozǵalysyn jasyrý úshin paidalanylatyndyqtan, quqyq qorǵaý organdarynyń erekshe baqylaýynda bolady.
