Mańǵystaýda týrizmdi damytýǵa arnalǵan memlekettik qoldaý qarjysy jeke kásipkerdiń zańsyz paidasyna ainalǵan. Sot kásipkerdi 117,2 mln teńge biýdjet qarajatyn alaiaqtyq jolmen iemdenip, qylmystyq jolmen alynǵan aqshany zańdastyrǵany úshin kináli dep tapty, dep habarlaidy ult.kz.
Mańǵystaý oblysy prokýratýrasynyń málimetinshe, jeke kásipker «A» demalys bazasynyń qurylysyn júrgizýge jumsalǵan shyǵyndardyń bir bóligin óteý úshin memleketten sýbsidiia alǵan. Alaida kásipker usynǵan jobalyq-smetalyq qujattarda oryndalǵan qurylys jumystarynyń kólemi negizsiz kóbeitilgeni anyqtalǵan.
Tekserý kezinde demalys nysany memlekettik qoldaý sharalary engizilgenge deiin salynyp qoiǵany belgili boldy. Sonymen qatar qujattarda kórsetilgen qurylys jumystarynyń bir bóligi is júzinde oryndalmaǵan.
Osylaisha kásipker memleketten 117,2 mln teńge kóleminde sýbsidiiany zańsyz alǵan.
Is munymen shektelmegen. Jymqyrylǵan biýdjet qarajaty bank depozitine ornalastyrylyp, odan taǵy 5,6 mln teńge kiris alynǵan. Tergeý bul áreketti qylmystyq jolmen alynǵan qarajatty zańdastyrý retinde baǵalaǵan.
Aqtaý qalalyq sotynyń úkimimen jeke kásipker «A» asa iri mólsherde alaiaqtyq jasaý jáne qylmystyq jolmen alynǵan aqshany zańdastyrý qylmystaryn jasaǵany úshin kináli dep tanyldy. Oǵan 5 jylǵa bas bostandyǵynan aiyrý jazasy taǵaiyndaldy.
Sot úkimi zańdy kúshine endi.
Prokýratýra memlekettik qoldaý baǵdarlamalary arqyly bólinetin biýdjet qarajatyn zańsyz iemdengender zań aldynda jaýap beretinin eskertti.
