QR Tótenshe jaǵdailar ministri Iýrii Ilin Shyǵys Qazaqstan oblysyndaǵy sý basý qaýpi bar aýmaqtardy áýeden barlady, dep habarlaidy "Ult aqparat".
Iýrii Ilin Shyǵys Qazaqstandaǵy jumys saparynyń ekinshi kúninde óńirdegi sý tasqyny qaýpi bar aýmaqtardy áýeden barlaý júrgizdi.
«Áýeden sholý nátijesinde Buqtyrma sý qoimasy mańyndaǵy Barlyq, Korobiha, Sennoe, Bykovo, Bogatyrevo, Maleevsk, Pýtintsevo, Zýbovsk, Turǵysyn, Parygino men Snegirevo eldi mekenderindegi jaǵdaiǵa monitoring jasaldy. Qazirgi tańda jaǵdai qalypty. Seń júrýi baiqalmady. Sondai-aq Iýrii Ilin Buqtyrma ózenindegi muz jarý jumystaryn tekserdi. Ondaǵy usaqtalǵan muz aýdany 13000 tekshe metrdi qurady. Qazirgi ýaqytta ózendegi muz qalyńdyǵy – 70 sm», - dep habarlady ShQO Tótenshe jaǵdailar departamentiniń baspasóz qyzmeti.
Barlaý qorytyndysy boiynsha Iýrii Ilin Shyǵys Qazaqstandaǵy tońnyń qatýy 1,5 metrge, jazyqtyqtaǵy qardyń biiktigi 90 sm deiin, al taýly aýdandarda 1,5- 2 metrge deiin jetýine bailanysty birqatar eldi mekendi sý basý qaýpi bar degen sheshimge keldi. Óńirde sý tasqyny qaýpi týyndaǵan jaǵdaida jergilikti atqarýshy organdarmen birlesip áreket etetin toptar qurylǵan. Onyń quramynda 3 myń adam, 24112 birlik tehnika jáne 370 motopompa bar. Budan bólek, 108 evakýatsiialyq beket daiyndalǵan.
«Kóktemi sý tasqyny - jaýapty da kúrdeli kezeń. Bizdiń mindetimiz – halyqty qarǵyn sýdan qorǵap, shyǵyndy barynsha azaitý. Turǵyndarǵa túsindirý jumystaryn júrgizip, jaǵdaidyń ózgergendigi týraly jedel habardar etý. Azamattar óz úileriniń mańaiyn jáne aryqtardy tazalaý boiynsha ýaqtyly sharalar qabyldaýy tiis», - dedi ministr.
