Mogýldan Olimpiada oiyndarynyń júldegeri ári álem chempiony Iýliia Galysheva men fristail-mogýldan ulttyq komandanyń bas bapkeri Elena Krýglyhina memlekettik nagradaǵa ie boldy, dep habarlaidy "Ult aqparat" Ulttyq olimpiada komitetine silteme jasap.
Marapatty Qazaqstan Ulttyq Olimpiada komitetiniń basshysy Timýr Qulybaev tapsyrdy. Aita ketý kerek, chempion men bapker Elbasy Nursultan Nazarbaevtyń 2018 jylǵy 5 jeltoqsandaǵy Jarlyǵyna sáikes, «Qurmet» ordenimen marapattaldy.
«Sizderdi joǵarǵy memlekettik nagradalaryńyzben quttyqtaimyn! Sizder shyn máninde úlken jumys atqardyńyzdar. Ótken jyly Olimpiada oiyndarynda sátti óner kórsetip, biylǵy álem chempionatynda barsha jankúierdi altyn medalmen qýantyp otyrsyzdar. Sizder úshin bul jeńiske barar jol ońai bolmaǵanyn bilemin. Aldymen qola júldege qol jetkizip, kelesi álem chempionatynda kúmis medal enshiledińizder. Qazaqstan sporty tarihynda tuńǵysh ret mogýldan álem chempiony atanyp, biikten kóringenińiz úshin qýanyshtymyn. Memleket basshysynyń qoldaýy men Úkimettiń júieli jumysy elimizdegi sporttyń damýyna serpin berip, jaqsy nátijeler tirkelýde. Osy oraida, qysqy jáne jazǵy sport túrlerin teń dárejede damytyp otyrǵan Shyǵys Qazaqstan oblysy basshylyǵynyń eńbegin de atap ótkim keledi», - dedi Qazaqstan UOK prezidenti.
«Bizge berilgen joǵary marapat úshin aitar alǵysymyz sheksiz. Biz shyn máninde úlken qoldaýdy kórip otyrmyz. Muny bizdiń kórsetkishterimizden baiqaýǵa bolady. Búginde biz tolyqqandy komanda jasaqtadyq. Jattyǵý jumystaryn júrgizip, joǵary nátije kórsetý úshin barlyq jaǵdai jasalǵan. UOK pen Mádeniet jáne sport ministrliginiń birlesken eńbegi arqasynda bizdiń aimaǵymyzda daiyndyqqa qajettiniń bári bar», - dep atap ótti E. Krýglyhina.
Iýliia Galysheva da memlekettik nagrada úshin alǵysyn bildirdi.
«Qurmet» ordeni - meniń búginge deiin alǵan eń joǵarǵy nagradam. Bul ári qarai tynymsyz eńbektenýge úlken serpin beredi. Memleket basshysymen jáne Olimpiada komitetiniń prezidentimen ótken búgingi kezdesý elimizdegi sportshylardyń qoldaýsyz qalmaitynyn kórsetedi. Bizdiń aldymyzda úlken mindetter tur. Biik shyńdardy baǵyndyrý úshin aianyp qalmaimyz», - dedi Iu. Galysheva.
Qazaqstan UOK prezidenti jyl basynan beri jankúierlerdi jetistigimen qýantqan sportshylardyń eńbegin umyt qaldyrǵan joq. Mogýl sportynyń ókilderinen bólek, kezdesýge «Tórt qurlyq chempionaty» týrniriniń kúmis júldesin jeńip alǵan mánerlep syrǵanaýshy Elizabet Tursynbaeva, Lahtide ótken jasóspirimder arasyndaǵy álem chempionatynyń qola júldegeri Sergei Tkachenko jáne WBC nusqasy boiynsha birinshi orta salmaqta jastar arasyndaǵy álem chempiony atanǵan Sadriddin Ahmedov te qatysty.
«2019 jyl Qazaqstanda Jastar jyly dep jariialandy. Jas sportshylarymyzdyń jyldy jeńispen bastaǵany qýantady. Bizdiń komandamyzda Iýliia sekildi búkil sportshylardy sońyna ertetin kóshbasshy bar. Olardyń sońynan talanatty jastar eretinine senimdimin. Bizdiń sportshylar bul jetistikpen toqtamai, bolashaqta jańa jeńisterimen jankúierdi qýantady degen úmit mol», - dedi T. Qulybaev.
Jiynnyń resmi bóligi aiaqtalǵan soń sportshylar óz daiyndyǵy men bolashaqqa josparlarymen bólisti.
