Qyrǵyzstanda qazaqstandyq jeńil atletika jattyqtyrýshysyn kólik qaǵyp óltirdi, - dep habarlaidy Tengrinews.kz agenttigi Kaktus.media portalyna silteme jasap.
Basylym málimetinshe, 16 shildede Ystyqkóldegi Bulan-Sógeti (Komsomol) aýylynda jeńil atletikadan jattyqtyrýshy Murat Júzgenbaevty kólik qaǵyp ketken. Oqiǵa kýágerleriniń aitýynsha, er adam oqýshysy júgirip júrgen kezde velosipedpen qasynda kele jatqan. Qyz aman-saý.
Ystyqkól oblystyq IIB baspasóz qyzmeti ókili jol apaty tańǵy saǵat 7.40 shamasynda bolǵanyn aitty. Kezekshi bólimge Bulan-Sógeti jáne Bósteri aýyldary arasynda jol-kólik oqiǵasy bolǵany týraly habarlama kelip túsken.
"Oqiǵa ornyna shyqqan jedel-tergeý toby Bishkektiń 41 jastaǵy turǵyny Ý.A. Lexus-330 avtokóligimen shyǵystan batysqa qarai, Balyqshy-Ananevo-Qarakól tasjolynyń 97-shaqyrymynda Grigorevka aýylynyń 40 jastaǵy turǵyny P.I. tizgindegen Nissan Micra avtokóligimen soqtyǵysqanyn anyqtady. Osydan keiin jol jieginde kele jatqan 58 jastaǵy Murat Júzgenbaevty qaǵyp ketken. Saldarynan Qazaqstan azamaty oqiǵa ornynda kóz jumdy", - dedi aimaq politseileri.
Bul derek Ystyqkól aýdanynyń Ishki ister basqarmasynda tirkelgen. Barlyq jinalǵan material tergeýge jiberilgen.
Aita keteiik, Murat Júzgenbaev Almaty oblysynda jeńil atletikadan aǵa jattyqtyrýshy bolǵan.
