Miýnhen qaýipsizdik konferentsiiasynyń tóraǵasy Volfgang Ishinger álem kóshbasshylaryn BUU-nyń bedelin nyǵaitý isine belsendi atsalysýǵa shaqyrdy, dep habarlaidy QazAqparat.
«Ashyǵyn aitý kerek, ujymdyq kúsh-jiger eń qaýipti daǵdarystar men halyqaralyq qaýipsizdiktiń qaterlerin retteý úshin jetkiliksiz. Adamdardyń ómiri qiylyp jatyr, qarýlaný jarysy jańa qarqyn ala bastady, jahandyq jylyný jalǵasýda. Sondyqtan álemdegi eń yqpaldy adamdardyń bul turǵyda tek sharasyzdyq tanytýy durys emes. Atap aitqanda, bul ahýal qazirgi qaýipti jaǵdaida óte tiimsiz bolyp tur», - dedi V. Ishinger Miýnhen qaýipsizdik konferentsiiasynyń 56-shy otyrysynda.
Onyń paiymynsha, osynyń saldarynan yntymaqtastyq pen beibitshiliktiń ornyna óshpendilik pen qaqtyǵystar beleń alýda.
«Búgingi jiyndy paidalana otyryp, birneshe eskertýdi atap ótkim keledi. Biz barshamyz BUU bedelin nyǵaitýǵa belsendi úles qosýymyz kerek. Onyń ishinde BUU Qaýipsizdik Keńesin de nazarda ustaýymyz kerek. Ol sheshimderdi oryndaý úshin ókilettigi bar jalǵyz organ. Qaýipsizdik Keńesi Liviia boiynsha qarardy qabyldaǵan kezde osy aptanyń basynda qandai da bir úmit paida boldy. Osy oraida elderdiń basym kópshiligi osy sheshimniń talaptaryn ustanady dep senim bildiremiz», - dedi Volfgang Ishinger.
Budan buryn habarlanǵandai, Memleket basshysy Qasym-Jomart Toqaev Germaniiadaǵy Miýnhen qaýipsizdik konferentsiiasyna qatysýda.
Miýnhen qaýipsizdik konferentsiiasynyń 56-shy otyrysy 2020 jyldyń 14-16 aqpany aralyǵynda ótedi. Atalǵan is-sharaǵa 40-qa jýyq memlekettiń basshylary, 100-den astam syrtqy ister jáne qorǵanys ministrleri, halyqaralyq qatynastar salasyndaǵy bedeldi sarapshylar, Eýrokomissiia ókilderi, sondai-aq Eýropalyq parlament depýtattary qatysýda.
Aita keteiik, jyl saiyn forýmǵa álemniń 70 elinen 400-600 adam qatysady. Olardyń arasynda memleket jáne úkimet basshylary, áskeri ári saiasi kóshbasshylar, ministrler kabinetiniń músheleri, Parlament depýtattary, ǵalymdar, saiasattanýshylar, azamattyq qoǵam ókilderi bar.
