Kúzgi-qysqy jylyý berý kezeńine kásiporyndardyń daiyndyǵy bekitilgen jóndeý kestesine sáikes júrgizilip jatyr. Bul týraly búgin Úkimet úiinde ótken baspasóz máslihatynda QR Energetika vitse-ministri Suńǵat Esimhanov aitty, dep habarlaidy QazAqparat.
Vitse-ministrdiń dereginshe, kúzgi-qysqy kezeńde el tutynýshylaryn turaqty energiiamen jabdyqtaý úshin Qazaqstannyń biryńǵai energetikalyq júiesi elektr stantsiialarynyń negizgi jabdyqtaryn jóndeýdi 2019 jylǵa arnalyp bekitilgen kestege sáikes júrgizip jatyr. Qazirgi ýaqytta 11 energobloktyń 5-eýi, 63 qazandyqtyń 40-y jóndelgen. Ár túrli kezeńde 4 energoblokta, 28 qazandyqta, 18 týrbinada jóndeý jumystary júrgizilip jatyr.
«Elektr jelileri boiynsha tiisti jóndeý jumystary júrgizilý ústinde. Búgingi kúni 84 paiyzy aiaqtaldy. Qalǵany keste boiynsha jalǵasyp jatyr. Qosalqy stansalarynyń sany 1 myńnan asady. Onyń 1152-sinde jóndeý jumystary aiaqtaldy. Bul 94 paiyzdy quraidy. Jóndeý jumystary merziminde aiaqtalatyndyǵyna kúmánimiz joq, baqylap otyrmyz», - dedi ol.
Sonymen qatar, onyń aitýynsha, ortalyqtandyrylǵan jylýmen qamtamasyz etý aimaǵyndaǵy 459 qazandyqtyń 428-i jóndeldi. Jóndeý jumystaryn oryndaý keste boiynsha júzege asyrylyp jatyr. Elektr stansalarynyń otyn qoimalarynda jalpy 4 mln tonna kómir jáne 101,9 myń tonna mazýt bar. Bul normativtik qorǵa sai keledi. Energiia óndiretin kásiporyndardyń otyndy satyp alýy jasalǵan sharttarǵa sáikes júrgiziledi. Otyndy jetkizý keste boiynsha júzege asyryp jatyr.
