Eýraziialyq ekonomikalyq odaq aiasynda Resei naryǵyna engen otandyq kompaniialar betpe-bet kelgen problemalaryn aitqysy kelmeidi. Bul týraly QR Saýda jáne integratsiia vitse-ministri Qairat Tórebaev málim etti, dep habarlaidy "Ult aqparat".
«EAEO degende ákimshilik kedergilerden buryn óte mańyzdy máselelerdiń biri – básekelestik. Ózińiz biletindei, Resei úlken memleket bolǵandyqtan, onda sapaly taýar shyǵaratyn kompaniialardyń sany óte kóp. Sondyqtan sapaly taýarlarmen birinshiden básekelestikke túsý kerek. Odan bólek, basqa memleketterden importtalatyn taýarlar da bar. Olarmen da báseke qyzý bolýy tiis. Úshinshiden, olardy utqannan keiin ǵana kedergiler paida bolýy múmkin. Máselen, «Zenchenko» kompaniiasy (RF naryǵyna kirgen) 5 qyrkúiekte saýda sórelerinde tek 2-3 paiyzdyq múmkindik beriletinin aitqan edi. Ol másele boiynsha biz Ulttyq ekonomika ministrligimen jumys júrgizdik. Másele tekserilip jatyr», - dedi ol OKQ-da ótken baspasóz máslihatynan keiin tilshilerge bergen jaýabynda.
Vitse-ministrdiń aitýyna qaraǵanda, qazaqstandyq bilik otandyq kompaniialar betpe-bet kelgen máselelerdi sheshýge tyrysady.
«Kóptegen kompaniia bizge problemalaryn aitpaidy. Óitkeni, olar kelesi joly RF bazarlarynda taýarymyzdyń joly jabyla ma dep qorqady. Jalpy Saýda jáne integratsiia ministrligi qazaqstandyq taýarlardyń shetelde ótkizilýine múddeli. Biz kásipkerlerimizdiń múddesin qorǵap, barlyq túiindi máselelerdi sheshkimiz keledi. Alaida ol problemalar týraly qoryqpai aitý kerek. Máselege keziktiń be – sabyrdy túrde suraqtardy pysyqtap, ortaǵa salý kerek. Sonda ǵana bizde áriptesterimizge qarsy naqty argýmenttermen shyǵa alar edik. Bálkim, bir jerde tehnikalyq qatelik bolýy múmkin, bir jerde tipti túsinispeýshilik týyndaǵan bolar. Sol sebepti, bizdiń taýardy kórshi elderdiń naryqtary qoldan kirgizbei otyr deýge bolmaidy. Árbir jaǵdaidy jeke-jeke qarastyrǵan abzal», - dedi ol.
Eske sala ketsek, osydan birneshe kún buryn Armeniia astanasy Erevanda ótken Joǵary Eýraziialyq ekonomikalyq keńestiń otyrysynda birneshe másele kótergen bolatyn. Memleket basshysynyń aitýynsha, EAEO-da keide ulttyq naryqtarda óziniń taýar óndirýshilerin qorǵaý mańyzdy sipatqa ie bolyp jatady.
«Biz erkin saýda ainalymy úshin qajetti normativti bazany jasadyq. Bul – jetistik. Alaida is júzine kelgende ulttyq naryqtarda jeke jaǵdailarda óziniń taýar óndirýshilerin qorǵaý talap-tilegi – integratsiianyń maqsaty men mindetterden mańyzdy sipatqa ie bolyp ketip jatady. Ártúrli saraptamalar, aimaqtyq deńgeidegi qosymsha talaptar, jasyryn nusqaýlar berý máselesi bar», - dedi Qasym-Jomart Toqaev jiynda.
