Ishki ister vitse-ministri Marat Qojaev bir apta buryn Zarechnyi kentindegi 155/8 mekemesinde "sýitsidten" qaza bolǵan tutqynnyń ólimine bailanysty is týraly aitty. 18 aqpanda "Halyq úni" ("Golos naroda") saity marqumnyń asqazanynan "tutqynnyń ólimine kináli" adamdardyń aty-jóni kórsetilgen hat tabyldy dep jazǵan.
"Ótkende bolǵan oqiǵa. Durys aitasyz. Saraptama kezinde hat tabylǵany ras. Ol týraly is tirkelip, qazir tergeý júrip jatyr" dedi 23 aqpanda Marat Qojaev Azattyq tilshisine.
Onyń sózinshe, "ózin-ózi óltirýge jetkizý" baby (105-bap) boiynsha qylmystyq is qozǵalǵan. Ázirshe eshkimge aiyp taǵylmaǵan.
"Qazir qandai da bir adamǵa aiyp taǵyldy dep aita almaimyn. Dálelder jinalǵan joq. Tergeý organdary jinaqtaǵan dálelderge sai aiyp taǵylatyn shyǵar. Eger kináli adamdar anyqtalsa" dedi Marat Qojaev.
"Halyq úni" saitynyń jazýynsha, 15 aqpanda Almaty oblysy Zarechnyi kentindegi 155/8 mekemesinde 1998 jyly týǵan Árken Qarasai esimdi sottalýshy "sýitsid jasaǵan". Ol ózine qol jumsamai turyp baýyryna hat jazyp, onda osy mekemeniń "ózin sýitsid jasaýǵa itermelegen" tórt qyzmetkeriniń aty-jónin ataǵan. Hatta Árken Qarasai ózi jazasyn ótep otyrǵan mekemedegi "jemqorlyq" týraly aityp, "túrme qyzmetkerleri jas jigitterdi mekemege jumys isteýge májbúrleidi, kelispese, uryp-soǵady, balaǵattaidy" dep jazǵan.
"Halyq úni" saity hattan "Osy máseleni sheship, olardy zań aiasynda tolyq jazalaýdy suraimyn. Bul hat meniń ishimde bolady, óz qolymmen jazǵanmyn. Ólimime tikelei osy adamdar kináli. Hat adresatyna jetedi dep oilaimyn" degen úzindi keltirgen.
Marqumnyń aǵasy Jáken Qasenov "Halyq úni" saityna baýyry 14 aqpanda telefonmen sóileskenin, "ólim aldynda jazǵan haty" týraly aqparat ertesinde tań ata túskenin aitqan.
"Biz keshke sóilestik. Tańerteń erte telefonymdy ashsam, saǵat 4.17-de túsken hatty kórdim. Birden koloniiaǵa tarttym, jolda onymen birge jazasyn ótep júrgender habarlasty. Onyń denesin tapqandar "asylyp óldi" dedi. Túrmege jetkende ol jaqta tergeýshiler, lager basshysy júrdi. Máiiti Qonaev qalasynyń máiithanasyna jetkizilgen" dedi Jáken Qasenov.
Almaty oblystyq qylmystyq-atqarý júiesi departamenti 15 aqpan tańǵy 6.00 shamasynda mekeme qyzmetkerleri tutqyn Árken Qarasaidyń denesi tabylǵanyn, al dárigerler ol "tunshyǵyp ólgenin" aitty.
"Sottalýshynyń denesin teksergen kezde dene jaraqaty anyqtalmady. Sot-meditsina saraptamasynyń barysy videoregistratorǵa tirkeldi. Sottalýshy jaqsy jaǵynan kóringen. Ákimshilikpen arada kikiljiń bolmaǵan" dep jazylǵan departament habarlamasynda.
Quqyq qorǵaýshylar men belsendiler Qazaqstan túrmelerinde adam ólimi jii bolatynyn aitady. Qańtardyń basynda Zarechnyidaǵy ózge mekemede Denis Vorontsov ólgeni belgili bolǵan. Prokýratýra tutqynnyń ólimine "asqazan aýrýy" sebep ekenin málimdegen. Quqyq qorǵaýshylar men marqumnyń týystary resmi málimdemege kúmándana qaraidy. Týystarynyń aitýynsha, marqumdy "mekemede azaptap, uryp soqqan".
Nurgúl Tapaeva,
