Elorda ákimi Altai Kólginov úsh másele boiynsha qaladaǵy kásipkerlerge úndeý joldady, dep habarlaidy "Ult aqparat" ákimdiktiń saityna silteme jasap.
Elorda ákimi Altai Kólginov saýda jáne oiyn-saýyq ortalyqtarynyń, saýda úileriniń, bazarlardyń, fitnes-ortalyqtardyń basshylarymen nysandardaǵy qatań sanitarlyq normalardyń saqtalýy jáne karantin sharalaryn jeńildetý týraly onlain keńes ótkizdi.
Qalanyń bas sanitarlyq dárigeri Aigúl Shaǵaltaeva qatań karantin engizilgen 5 shildeden bastap kásiporyndardan shamamen 73 million teńgege sanitarlyq normalardy saqtamaýǵa qatysty 800 fakti anyqtalǵanyn atap ótti.
«Birqatar nysan jumysyn qaita bastaǵaly ekinshi apta boldy. Qazir biz virýstyń áli joiylmaǵanyn túsinýimiz kerek. JRVI maýsymy aldynda koronavirýsqa qatysty ahýaldy qadaǵalaý qajet. Alǵashqy karantin tájiribesine súienip, qatelik jibermeý kerek. Ol úshin nysandarda qatań sanitarlyq-epidemiologiialyq normalardy saqtaý qajet.
Birinshi. Tiisti oryndarǵa statsionarlyq teplovizor ornatý usynylady, bul 30-40 kelýshiniń dene qyzýyn birden ólsheýge, adamdar aǵymyn tiimdi basqarýǵa múmkindik beredi. Sonymen qatar bul qyzmetkerlerdiń ózderin de qorǵaidy – ár kelgen adamǵa jeke mán berý jáne temperatýrany ólsheý qajet bolmaidy. Pandemiia bastalǵaly beri biz osyndai teplovizordy qalalyq emhanalarǵa ornattyq. Sondai-aq jeldetý júiesiniń úzdiksiz jumys isteýin qamtamasyz etý qajet, barlyq jerde áleýmettik qashyqtyq belgisi, sanitaizer bolýy kerek, maskasyz kirýge tyiym salynady.
Ekinshi. Sanitarlyq normalardyń buzylýyn anyqtaý boiynsha reid turaqty negizde júrgiziledi. Bul sharalar qaýipsizdikti jaqsartady. Reid barysynda «Artem» jáne «Big Shanhai» bazarlarynda eskertý jasaldy. Olarǵa aiyppul salyndy. Sanitarlyq normany ákimdik, inspektorlar úshin emes, klientińizdiń, azamattardyń qaýipsizdigi úshin saqtaý kerek ekenin este ustaǵan jón. Endi biz COVID-19 sharttaryn qabyl alyp, jańa jaǵdaiǵa beiimdelýge májbúrmiz. Eger ár basshy sanitarlyq normalardyń saqtalýyna jaýapkershilikpen qarasa, onda búkil ujym da jaýaptylyq tanytady. Bul kelýshiler qaýipsizdigi de qamtamasyz etiledi degen sóz.
Úshinshi. Fitnes ortalyqtary ókilderiniń usynysyn eskere otyryp, biz jumys ýaqytyn 21: 00-ge deiin sozdyq (buryn 17:00-ge deiin bolǵan). Bul basshylyqtyń klientter aǵynyn ýaqytyly saralai alýy úshin jasalady. Sondai-aq bir mezgilde kelýshiler kóp bolmaýy jáne tar dáliz qurylmaýy úshin basqa saýda nysandaryndaǵy jumys ýaqytyn sozý joldaryn qarastyramyz», – dep túiindedi sózin elorda ákimi Altai Kólginov.
Onlain jinalysta kásipkerler kótergen birqatar máseleler sheshimin taýyp, qalǵany jumysqa alyndy.
