Aqtaýdaǵy ońaltý shipajaiynda demalǵan kezde belgisiz parazitterdi juqtyrǵan áiel men qyzy qanaǵattanarlyq jaǵdaida aýrýhanadan shyǵarylatyn boldy. Bul týraly Pavlodar oblystyq infektsiialyq balalar aýrýhanasy direktorynyń infektsiialyq statsionar boiynsha orynbasary Zere Sadaqova málimdedi, dep habarlaidy Sputnik Qazaqstan.
"Qyzy men anasy bir apta buryn aýrýhanaǵa jatqyzyldy. Olar teriniń qyshýy jáne sýǵa túsý kezinde teri astynan qanatty jándikterdiń shyǵýyna shaǵymdanǵan bolatyn. Eki aidan beri osy qiyndyqqa tap bolǵan", - dedi ol oblystaǵy óńirlik kommýnikatsiialar qyzmetinde ótken baspasóz konferentsiiasynda.
Aitýynsha, statsionarǵa jatqyzylǵan kezde olar densaýlyǵyna shaǵymdanbaǵan, dene qyzýy qalypty bolǵan. Osy ýaqytqa deiin terige óńdeý júrgizilgen. Qyzdyń anasy jinaǵan material oblystyq SES-tegi parazitologiialyq zerthanaǵa joldanyp, ol jaqtan bul jándikter gelmint (parazitti qurt – Sputnik) nemese onyń dernásili emes ekeni týraly jaýap keldi.
Dál osyndai material Ulttyq saraptama ortalyǵynyń asa qaýipti infektsiialar zerthanasyna da jiberilgen. Alaida olar jándiktiń túrin anyqtai almaǵanyn habarlaǵan. Odan buryn júrgizilgen ambýlatoriialyq emdeý kezinde bul jándikter mamyq jegiler tobyna, iaǵni qustar men sútqorektilerdiń syrtqy usaq parazitterine jatatyny týraly qorytyndy jasaldy (Mamyq jegiler keneler sekildi qanmen qorektenbeidi, olar qanat nemese túkpen, sondai-aq teriniń múiizdi qabyǵynyń qabyrshaǵymen qorektenedi – Sputnik).
"Anasy men qyzynyń jaǵdaiy qanaǵattanarlyqtai bolýyna jáne teri astynda parazitterdiń endi anyqtalmaǵanyna bailanysty búgin aýrýhanada shyǵarylady dep josparlanýda", - dedi Zere Sadaqova. Ol osy sekildi simptomdarǵa shaǵymdanǵan ekinshi áiel infektsiialyq aýrýhanaǵa kelmegenin aitty.
Aita keteri, múgedek balalardy kútip otyrǵan birneshe otbasy Aqtaýǵa shipajaiǵa barǵan. Parazitter sol jaqta juqqan.
Úige oralǵan soń jalǵyzbasty ana óz denesinde de jándikterdi kórgen. Ol qyzymen birge kúnine birneshe ret ystyq dýsh qabyldap, parazitke qarsy ondaǵan em shara jasaýǵa májbúr boldy.
Pavlodarlyq taǵy bir otbasy da parazitterge qatysty shaǵymdandy. Biraq shipajai ákimshiligi bul jaǵdaiǵa qatysty eshqandai túsinikteme bermedi.
