Búgin elordadaǵy Dostyq úiinde Qazaqstan Konstitýtsiiasy kúnine arnalǵan «Táýelsizdiktiń 30 jyldyǵy – birliktiń, beibitshilik pen kelisimniń 30 jyldyǵy» taqyrybynda dóńgelek ústel ótti, dep habarlaidy QazAqparat.
«Árine, biyl Qazaqstan úshin erekshe jyl, egemendigimizdiń 30 jyldyǵyn atap ótemiz. Sonymen qatar osy ýaqytta jetken jetistikterimizdi saralap, aldaǵy jolda qandai maqsattarymyz turǵyndyǵyn eske salý oimen jinalyp otyrmyz. Qazaqstan - erekshe el. Árdaiym biz osyny maqtanyshpen aitamyz. Elimiz táýelsizdigin alǵannan beri birizdilik pen reformalar jolyn tańdap, sonyń negizgi konstitýtsiialyq qaǵidattaryn syrt qaldyrǵan emes», - dedi is-sharany ashqan Qoldanbaly etnosaiasi zertteýler institýty direktorynyń orynbasary Aigúl Sadýaqasova.
Dóńgelek ústel barysynda Májilis depýtattary, Qazaqstan halqy Assambleiasy saraptamalyq keńesiniń músheleri, ziialy qaýym men etnomádeni birlestikterdiń ókilderi qatysty.
Májilis depýtaty Natalia Dementeva elimizdegi tildik ahýalǵa keńinen toqtaldy.
«Bizdiń bir ǵana otanymyz bar. Ol – Qazaqstan. Elbasymyzdan bastaý alǵan basty qundylyq ultaralyq, etnosaralyq kelisimdi saqtap, ári qarai kelesi urpaqqa jetkizý bizdiń mindetimiz. Ony joǵaltýǵa haqymyz joq. Óitkeni, kelesi urpaqtyń aldynda jaýap beremiz. Sondyqtan ultaralyq tatýlyqty saqtap, memlekettik tildi úirenip, aqyryn-aqyryn sóilei bastaýymyz kerek», - dedi Májilis depýtaty.
Reseide týǵanymen otbasylyq jaǵdaiǵa bailanysty ata-anasymen Jambyl oblysyna qonys aýdarǵan Viktoriia Tregýbova elimizde tilge bailanysty kemsitýshilik joq ekendigin aitady. Tipti, memlekettik tildi jetik bilgen ózge ult ókilderiniń qazaqtardyń arasynda abyroily ekendigine nazar aýdartady.
«Qazaq tilin, qazaqtyń salt-dástúrin bilgendikten, syilaǵandyqtan bolar, eshqashan qysym kórgen emespin. Kerisinshe, syilaidy, qurmetteidi, dáripteidi, árqashan qoldaý kórsetedi. Sony ǵana áli kúnge deiin kórip kelemin. Sondyqtan aitarym, qazaq tilin bilgeniń sol ulttyń tilin, salt-dástúrin, halqyn syilaǵanyń. Jalpy qazaq halqy árqashan da ózge ult ókilderine qonaqjailyq tanytady. Áli kúnge deiin tilin bilmeseń de qamqorlyqpen qaraidy. Qazaq tilin úirenemin deseńiz de esh qiyndyq joq. Barlyq jaǵdai jasalǵan, mektepten bastap tegin kýrstar da bar. Nieti bar adam memlekettik tildi úirenip alady.», - dedi Viktoriia Tregýbova.
