Atyraýda velosipedpen 1,1 mln teńgeniń esirtkisin tasymaldaǵan er adam ustaldy, dep habarlaidy "Ult aqparat".
Oblystyq politsiia departamenti baspasóz qyzmetiniń aqparatyna qaraǵanda, 3 tamyzda Atyraý qalasynda esirtki tasymaldaýshy ustalǵan.
«Esirtki qylmysyna qarsy is-qimyl basqarmasy men patrýldik politsiia qyzmetkerleri qala kóshelerinen 33 jastaǵy er adamdy ustady. Ol velisiped jyldamdyǵyn arttyryp, tártip saqshylarynan qashyp ketpek bolǵan. Alaida, patrýldik politsiia qyzmetkerleri kúdiktiniń qashyp ketýine múmkindik bermedi. Tintý kezinde odan quny 1,1 mln teńgeni quraityn 40 qara polietilen paketke salynǵan mefedron sintetikalyq esirtkisi tabyldy», - dep habarlady departamenttiń baspasóz qyzmeti.
Qazir ustalǵan kúdiktige qatysty QR Qylmystyq Kodeksiniń 296-babynyń 4-bóligimen sotqa deiingi tergeý júrip jatyr. Kúdikti ýaqytsha oqshaýlaý izoliatoryna qamaýǵa alyndy.
