16 qazan kúni QR Ulttyq mýzeiinde «Vastram: úndi toqymasynyń ásem álemi» atty dástúrli úndi toqymasynyń kórmesi ashyldy.
Kórmeni Úndistannyń Qazaqstandaǵy Elshiliginiń Svami Vivekanda atyndaǵy Mádeni ortalyǵy men QR Ulttyq mýzeii birlesip uiymdastyrdy.
Kórmeniń ashylý saltanatynda sóz alǵan QR Mádeniet jáne sport ministrligi Mýzeiler men kitaphanalar basqarmasynyń basshysy Gúlzeinep Pazylova: «Ózderińizge málim Úndistan eli óziniń óneri, mádenietimen erekshelenedi. Sonyń ishinde kinoindýstriia salasynda, jalpy bi óneri salasynda jetken jetistikteri zor. Al búgingi shara bizdi úndi eliniń toqyma ónerimen tanystyrmaq. Búgingi mádeni sharanyń eki el arasyndaǵy yntymaqtastyq qarym-qatynasqa oń yqpalyn tigizeri sózsiz. Sizderdi kórmeniń ashylý saltanatymen QR Mádeniet jáne sport ministrliginiń atynan jáne óz atymnan quttyqtaimyn», - dedi.
Mahatma Gandi (1869-1948) óziniń beizorlyqqa negizdelgen quraldaryn qoldana otyryp milliondaǵan adamdardy imperializmniń ezgisinen qutqardy. Imperializmge qarsy kúresinde ol Hadidi - Charkhaǵa nemese ainaldyrý dóńgelegine oralatyn iirimjipti – aýyl turǵyndarynyń óz betinshe jumyspen qamtylý jáne kópshiliktiń ózin-ózi qamtamasyz etý quraly retinde paidalanǵan bolatyn.
Qazaqstandaǵy Úndistan Respýblikasynyń Tótenshe jáne Ókiletti Elshisi Prabhat Kýmar: «Búgingi shara Mahatma Gandidiń 150 jyldyǵyna orai uiymdastyryldy. M. Gandi Úndistan ult-azattyq qozǵalysynyń qairatkeri. Ol kúresti qarý kúshimen emes, beibit jolmen júrgizýge tyrysty, uly maqsat jolynda qandai da bir kúsh qoldanýǵa jan-tánimen qarsy boldy. Uly tulǵanyń arqasynda Ulttyq halyq Kongresi partiiasy Úndistan halqynyń zor qoldaýyna ie boldy. Belgili tulǵanyń mereitoiyna arnalǵan búgingi kórmeden úndi halqynyń mádenietin tamashalai alasyzdar»,- dep óz pikirin bildirdi.
QR Ulttyq mýzeii direktorynyń orynbasary Maral Baltyshev: «Mahatma Gandi úndi eliniń azattyǵy jolynda bar ómirin arnaǵan tulǵa. Zulymdyqqa qarsy shyǵyp, beibit jolmen ǵana halqynyń amandyǵy úshin qyzmet etti. Sonyń bir kórinisi retinde toqyma ónerin qalyptastyryp, elin eńbekke baýlydy. Maqta ónerkásibin qalyptastyry, toqyma óneri búgingi kúnge deiin qarqyndy damyǵan», - dep atap ótti.
Kórme Mohandas Karamchand Gandidiń (1869-1948) týǵanyna 150 jyl tolýyna arnalǵan merekelik is-sharalardyń biri sanalady. Merekelik sharalar 2018 jyldyń 2 qazanynda bastalyp, 2020 jyldyń 2 qazanyna deiin jalǵasady.
Dástúrli úndi toqymasynyń kórmesin áigili sýretshi jáne modeler Shelli Djoti arnaiy Úndistannyń mádeni bailanystar keńesi úshin ázirlegen.
Kórme 2018 jyldyń 25 qazanyna deiin jalǵasady.
