Ýkrainalyq kásipqoi boksshy Vasilii Lomachenko Niý-Iorktegi Madison Square Garden kesheninde ótken boks keshiniń basty kezdesýinde kýbalyq boksshy Gilermo Rigondony jeńip, ekinshi jartylai jeńil salmaqta WBO chempiondyq ataǵyn qorǵap qaldy, dep habarlaidy "Ult aqparat".
Vasilii Lomachenko 12 raýndqa josparlanǵan jekpe-jektiń 7-shi kezeńinde qarsylasynyń aiqasty ary qarai jalǵastyrýynan bas tartýyna bailanysty merziminen buryn aiaqtady. Osylaisha ýkrainalyq boksshy kásipqoi bokstaǵy 10-shy jeńisine qol jetkizip otyr. Al Rigondo sporttyq mansabynda alǵash ret jeńildi.
Vasilii Lomachenko men Gilermo Rigondo áýesqoi boksta aýyz toltyryp aitatyndai jetistikke jetken boksshylar. Kýbalyq 2000 jáne 2004 jyldary, ýkrainalyq 2008 jáne 2012 jyldary Olimpiada chempiony atanǵan.
