Foto: Úkimet
Qazaqstandyq delegatsiianyń Vashingtonǵa resmi sapary barysynda Dúniejúzilik banktiń shtab-páterinde «Qaraǵandy-Jezqazǵan» avtojolynyń qurylysyn qarjylandyrý týraly kelisimge qol qoiyldy, dep habarlaidy Ult.kz.
Kelisim «QazAvtoJol» UK» AQ, Halyqaralyq qaita qurý jáne damý banki men Aziia infraqurylymdyq investitsiialar banki arasynda jasaldy.
Joba kólik infraqurylymyn damytýǵa, tranzittik áleýetti arttyrýǵa jáne óńirlerdiń bailanysyn jaqsartýǵa arnalǵan. Jańa jol júrý ýaqytyn edáýir qysqartýǵa, qozǵalys qaýipsizdigin arttyrýǵa jáne Ortalyq Qazaqstannyń damýyna qosymsha serpin beredi.
Qazirgi ýaqytta konkýrstyq rásimder sońǵy satysynda tur. Joldyń uzyndyǵy – 457 shaqyrym. Qaryz somasy – 650 mlrd teńge. Biyl avtojoldy jobalaý jumystary jáne qurylysy bastaý alady.
Joba sonymen qatar logistikany damytýǵa, óńirdiń investitsiialyq tartymdylyǵyn arttyrýǵa jáne jańa jumys ornyn qurýǵa múmkindik beredi.
Darhan Imanashev, «QazAvtoJol» UK» AQ basqarma tóraǵasy:
"Qazirgi tańda biz AQSh-taǵy Vashington qalasynda, halyqaralyq qarjy institýtynyń biri – Dúniejúzilik banktiń ofisindemiz. Bul kezdesý kezinde búgin Qyzylorda-Qaraǵandy-Jezqazǵan jobasy boiynsha kelisimshartqa qol qoiyldy. Bul joba, bárine málim, kópten kútken joba. Biyl kúz maýsymynda 500 shaqyrymnan astam joldyń qurylys jumysy bastalady.
Sonymen qatar, qazirgi tańda Dúniejúzilik bankpen taǵy bir mańyzdy kelisimshart jumysy júrgizilip jatyr. Ol – Beineý-Sekseýil jobasy. Bul temirjol jelisi Prezident tapsyrmasyna sáikes, osy jyly salynýy tiis. Biyl qurylys jumysy bastalady.
Onyń birinshi maqsaty – Qytai men Batystyń taýar tasymaldaý jolyn qysqartý. Jalpy uzyndyǵy – 600 shaqyrymdai. Iaǵni, jańa joba júzege asyrylǵan kezde jol qazirgi ýaqytpen salystyrǵanda 900 shaqyrymǵa qysqarady. Osy jol arqyly Ortalyq Aziiadan Batysqa jáne Qytaidan Batysqa taýar jetkiziledi. Bul joba júzege asyrylǵannan keiin, júk tasymaly kólemi kem degende 40%-ǵa ulǵaiady dep otyrmyz".
