Álemdik jáne ishki naryqtardaǵy oryn alǵan jaǵdailarǵa, sondai-aq QR Ulttyq bankiniń bazalyq mólsherlemesiniń ósýine bailanysty Qazaqstannyń depozitterge kepildik berý qory (QDKBQ) 2020 jyldyń 26 naýryzynan bastap depozitterdiń jekelegen túrleri boiynsha mólsherlemelerdiń ózgeretindigin habarlady.
QDKBQ bir jyl jáne odan joǵary merzimge arnalǵan, shetel valiýtasyndaǵy merzimdi jáne jinaq depozitter boiynsha usynylǵan eń joǵary mólsherlemelerdi 1 paiyzǵa deiin tómendetti. Osylaisha qazirgi ýaqytta shetel valiýtasyndaǵy depozitterdiń barlyq túrleri boiynsha mólsherlemeler birdei deńgeide belgilendi.
Bul shara 2020 jylǵy 15 naýryzda AQSh-tyń Federaldyq rezervtik júiesiniń negizgi mólsherlemesiniń tómendeýine jáne sonyń izinshe álemdik naryqtarda shetel valiýtasyndaǵy tabystylyqtardyń tómendep ketýine bailanysty qabyldandy. Bul óz kezeginde shetel valiýtasyndaǵy depozitter boiynsha mólsherlemelerdi osy depozitterge qatysty álemdik mólsherlemelermen teńdestirýge múmkindik beredi.
Sonymen qatar qor tolyqtyrý quqyǵy bar, teńgedegi depozitterdiń myna túrleri boiynsha usynylǵan eń joǵary mólsherlemelerdi:
· bir jáne eki jylǵa arnalǵan merzimdi depozitter boiynsha tiisinshe 10,7% jáne 10,8% deiin;
· 3 ai, 6 ai, bir jáne eki jylǵa arnalǵan jinaq depozitter boiynsha tiisinshe 13,0%, 13,4%, 13,0% jáne 12,6% deiin;
· merzimsiz depozitter boiynsha 12,5% deiin azaitty.
QDKBQ-nyń eń joǵary mólsherlemelerdi belgileý ádistemesine sáikes tolyqtyrý quqyǵynyń quny memlekettik baǵaly qaǵazdardyń (MBQ) tabystylyǵyna táýeldi. Qazaqstan Respýblikasy Ulttyq Bankiniń bazalyq mólsherlemesiniń ulǵaiýy memlekettik baǵaly qaǵazdar tabystylyǵynyń ósýine yqpal etti. Bul rette MBQ tabystylyǵy tolyqtyrý quqyǵy qunynyń joǵary baǵalanýyna áser etip otyr. Ol óz kezeginde tolyqtyrylatyn depozitter boiynsha eń joǵary mólsherlemelerdi azaitady.
Merzimsiz depozitterdi kez kelgen ýaqytta tolyqtyrýǵa jáne alýǵa bolatyndyqtan, olar boiynsha usynylǵan eń joǵary mólsherleme de qaita qaraldy.
Bankter tolyqtyrý quqyǵy bar, valiýtalyq jáne teńgelik depozitter boiynsha mólsherlemelerdi 2020 jyldyń 26 naýryzynan bastap ózgertýge quqyly. Bul rette jańartylǵan mólsherlemeler buryn ashylǵan depozitterge taralmaidy, tek jańa slymdarǵa ǵana tiesili.
